Ministerio di Transporte, Integridad, Naturaleza y Asunto di Adulto Mayor lo enfoca den tur departamento y tarea riba adapta y/o actualiza leynan existente, como tambe crea ley nobo den caso necesario.
Asina lo traha pa mehora funcionamento cu enfoque riba rentabilidad financiero y maneho sostenible. Lo brinda sosten y herment necesario pa eleva calidad di servicio y eficiencia di personal, aplicando principionan general di bon gobernacion enfoca especialmente riba transparencia y responsabilidad. Ta haci tur esaki teniendo na cuenta e posibilidad y limitacionnan financiero di Pais Aruba pa garantiza un maneho responsable.
Transporte
Transporte ta conecta persona como tambe oportunidad. Lo enfoca na introduci maneho sostenible den transporte en general cu ta crea oportunidad y desaroyo economico, reactivacion di potencialnan economico riba tereno di nabegacion, aviacion y transporte publico y alavez contribui na un mihor mobilidad y bienestar den comunidad.
• Brinda sosten na Departamento di Aviacion, IBSL y Servicio Metereologico pa eleva servicio y funcionamento. Meta ta pa Aruba cumpli cu acuerdo internacional manera ICAO, SOLAS y conforme normanan cu organisacion maritimo internacional y Nacionnan Uni.
Tambe lo reforza cooperacion inter-departamental pa por sigui brinda sosten cardinal na
e.o sector maritimo, aereo y primario.
• Crea maneho sostenible na Arubus N.V. pa un servicio di transporte publico eficiente y cu mobilidad optimo pa comunidad, especialmente adulto mayor y esnan cu limitacion fisico.
• Maneho pa trece solucion di parkeo den centro di ciudad y otro areanan destina pa parkeo. Ta necesario sostene y evalua funcionamento di e.o. Aruparking y Arutram.
• Impulso y maneho pa eleva servicio, innovacion y digitalisacion di Departamento di Transporte Publico enfocando riba transparencia den procesonan exsistente.
• Combati transporte ilegal, cu instrumento necesario pa team di inspeccion di DTP y reforza
cumplimento di ley existente.
Evalua ley, reglamentacion y proceso di otorgamento di permiso di transporte publico (entre otro taxi, tours y autobus) pa crea proceso y proceduranan mas transparente, integro y husto, cu meta pa elimina patronahe politico.
Ta evalua introduccion di un moratorium temporal pa conduci investigacion riba demanda y oferta riba e mercado aki pa introduci maneho responsable. Tambe evalua y adapta Landsverordening personenvervoer en general.
Prioridad: Introduci maneho general di mobilidad y transporte den areanan di naturaleza y tur otro aspecto cu impacto riba naturaleza, e.o. UTV’s/ATV’s.
• Introduci maneho di transporte maritimo sostenible catalizando potencial economico den harmonia cu bida maritimo y naturaleza.
Integridad
Den forma continuo y permanente lo enfoca riba salvaguardia y promove integridad den henter nos comunidad, stimulando pensamento y actuacion integro riba tur nivel cuminzando na e gobernantenan:
• Por medio di transparencia, control y balansa (`checks and balances’), regulacion, organo di control y accion gubernamental lo eleva nivel di integridad den gobernacion.
• Recomendacionnan di ‘Transparency International’, incluyendo e resultado di e `National Integrity Scan’, como tambe principionan di ‘Open Data’ y’ Sustainable Development Goal 16′ como fuente y puntonan di salida pa maneho di integridad gubernamental.
• Maneho pro-activo den comparti informacion. Pa percura pa trato igual di ciudadano, lo trece
transparencia den procesonan gubernamental, por ehemplo di otorgamento di permiso y tereno.
Riba nivel di ministro mas transparencia den decisionnan tuma y formacion, salario y otro gasto di bureau di ministro.
• Evalua y adapta o reemplaza Landsverordening Openbaarheid van Bestuur (LOB).
• Formaliza Bureau Integriteit Aruba (BIA) den un ley y percura pa BIA tin e recursonan necesario pa su tarea.
• Introduci Codigo di Conducta pa ministro, aparato gubernamental y compania estatal.
• Proposicionnan concreto pa fortificacion di e ordenanza partidonan politico y brinda oportunidad huridico na electorado pa supervisa financiamento di partido politico.
• Aumenta participacion di Pueblo den democracia por medio di plataforma cu ta duna ciudadano acceso na informacion necesario, tambe posibilidad pa delibera y expresa nan opinion.
• Fortifica institucionnan cu tarea di controla of conseha gobierno. Esaki ta inclui Parlamento, Raad van Advies, Algemene Rekenkamer, Centrale Accountantsdienst, Sociaal Economische Raad y Bureau Integriteit Aruba.
• Lo institui Ombudsman y evalua introduccion di un Corte Constitucional pa fortifica funcionamento di Constitucion.
• Lo promove comunicacion encuanto integridad den comunidad.
Naturaleza
Den forma integral lo traha na conserva y protege naturaleza, enfrenta retonan existente, cuida fauna y medio ambiente, stimula reciclahe y reduccion di desperdicio, y stimula sector primario.
• Lo trece solucion duradero pa garantiza un mihor sistema di anda cu, separa, colecta y
procesa desperdicio. Alavez stimula reciclahe y reduccion di desperdicio den comunidad enfocando riba rentabilidad financiero y maneho sostenible.
• Crea conscientisacion di urgencia di problematica di Parkietenbos, RWZI-Bubali y henter
problematica di desperdicio solido y liquido. Lo enfoca riba solucionan a corto plazo enfoca
riba sostenibilidad y uso di potencial existente den e menazanan serio pa salud, naturaleza, turismo y calidad di bida.
• Sondea posibilidad pa realisa un plan sostenible pa conservacion y integracion di 5 saliña (‘wetlands’) en conexion cu RWZI-Bubali.
• Trece solucion responsable den problematica di desperdicio na Parkietenbos.
Ampliacion cu mas incinerator considera como un di e posibilidadnan pa yega na solucion duradero.
• Situacion financiero y operacion di Serlimar ta exigi atencion di inmediato. Serlimar lo ta haciendo peticion di sosten pa cumpli cu su creditornan. Punto di salida: revisa e organisacion total y evalua potencial y retonan existente. Lo tene cuenta cu minimalisacion di metemento
politico y yega na solucion realistico.
• Respeta y ancra derecho di naturalesa ‘Rights of nature’ den Constitucion, pa yega na un
balance harmonioso entre naturaleza y accion di ser humano.
• Crea mas concientizacion den comunidad riba temanan di naturaleza cu miras riba conservacion, educacion y recreacion (CER), medio ambiente, desperdicio, agricultura, cuido y bienestar di animal, y inculca esaki den educacion y enseñanza primario y secundario.
• Continuacion di plan nacional como solucion pa animal riba caya, pa combati problema di cacho riba caya, stimula responsabilidad di doño di animal y segura bienestar general di tur animal.
• Sosten y estimulo pa sector di agricultura, cria y pesca creando oportunidad y cooperacion den retonan enfrenta manera tereno, awa, coriente, conocimento y finanzas.
Esakinan indica tambe den un rapport di World Bank. Meta: aumenta grado di seguridad di alimento aumentando produccion nacional di agricultura di 3% pa 10 of 15% den proximo 4 aña y na 25% na 2030. Esaki basa riba normanan internacional di Good Agriculture Practices (GAP) y Good Manufacturing Practices (GMP).
Introduci Strategia Maritimo Nacional, balanza pa cuido di bida maritimo, oportunidadnan di pesca y otro potencial economico den e sector.
Introduci maneho pa stimula bio-diversidad por medio di cosecha y aprecio pa agricultura.
Asuntonan di Adulto Mayor
Garantiza calidad de bida, bienestar general y cuido di adulto mayor ta compromiso di gobierno, pa cual lo centraliza tur asunto cu ta regarda adulto mayor na un solo punto. Lo institui Departamento Pa Asunto di Adulto Mayor, encarga pa ehecuta maneho integral pa adulto mayor. E maneho integral lo incorpora tur aspecto di prioridad pa adulto mayor:
o Cuido formal y informal; establece normanan di calidad den centronan di cuido y guia pa cuidadornan
informal. Introduci implementacion y ehecucion di Landsverordening verzorgingshuizen;
o Prevencion di malesa y negligencia;
o Guia y informacion;
o Bienestar general considerando salud y cuido, finanzas, transporte, contacto social y vivienda;
o Promove `active aging’;
o Aumenta participacion y mantene independencia, especialmente riba mercado laboral y den vivienda .
E departamento lo brinda servicio di guia na cliente, cuidador informal y centronan di cuido.
Tambe lo ta punto di registracion di negligencia y maltrato.
Formaliza e “Raad voor Ouderen (RaVO) pa conseha gobierno riba tema relevante pa Adulto Mayor.
Lo traha den cooperacion cu ministerio di Asunto General pa finaliza y formaliza e Bureau Secretariele Ondersteuning (BUSO) adaptando e instellingsbesluit di e secretariado di Sociaal Economische Raad.
Maneho di e ministerio ta den alineacion cu metanan di desaroyo sostenible (Sustainable Development Goals) y e Landspakket. E tareanan encuanto sostenibilidad, naturaleza, medio ambiente y integridad no a ser inclui den e Landspakket. No obstante e temanan aki ta base pa tur tema den e landspakket y lo brinda apoyo na tur otro ministerio den esaki.
