Manera ta conoci Gabinete AVP-FUTURO a firma e plan di gobernacion diahuebs 27 di maart. Den esaki nan ta fiha e prioridadnan den e maneho di gobierno pa e periodo di gobernacion cu a caba di cuminsa.

E plan di gobernacion AVP-FUTURO ta forma e base pa locual comunidad di Aruba por spera den e periodo di gobernacion 2025-2028. Un di e obhetivonan di e plan di gobernacion aki ta pa duna Parlamento di Aruba e herment pa cumpli cu su rol pa controla gobierno. E ta duna tur parlamentario, sin distingui di cual fraccion nan ta, e posibilidad pa monitor, evalua y exigi e gobierno nobo duna cuenta tocante cada compromiso y meta cu nan ta propone.

E plan di gobernacion ta consisti di diferente punto di atencion, entre otro, mehora poder di compra di henter comunidad, dunando prioridad na e grupo di ciudadano cu un entrada abou. Esaki, e gabinete ta mira lo hiba un maneho pa crea un reparticion husto di e recursonan di e pais.

Gabinete AVP-FUTURO ta remarca cu den e plan di gobernacion lo traha structuralmente riba diferente tereno y den sinergia cu e diferente ministerionan pa reduci costo di bida y combati pobresa den comunidad. “E pensamento su tras ta cu loke nos pais produci mester ser comparti miho cu tur hende na Aruba!”

Pa e gobierno nobo aki e modelo economico, incluso e modelo turistico mester ta uno cu ta den beneficio di e ciudadano, cu e meta final pa crea prosperidad y bienestar comparti pa tur hende na Aruba.

E plan di gobernacion ta destina pa atende puntonan di prioridad na beneficio di comunidad. Cuminsando cu trece alivio pa gastonan esencial di pueblo y controla costo di bida, introduciendo un sistema integral pa mehora poder di compra.

E plan di gobernacion ta inclui tambe como meta reduci costo di haci negoshi, promove inversion di sector priva y stimula comercio pa crea mas y miho cupo di trabou; y implementacion di un structura di dialogo continuo cu sector priva y partnernan social.

Negociacion cu Hulanda tambe ta un di e puntonan di enfoke, y den e plan di gobernacion di Gabinete AVP-FUTURO tin e obhetivo pa negocia un acuerdo cu Hulanda pa reduci drasticamente e interes riba Aruba su debe, crea un fondo di inversion, y negocia cu Hulanda pa converti e debe di 900 miyon den inversion pa Aruba.

Un di puntonan di prioridad desde algun tempo caba tabata pa mehora substancialmente e pensioen di adulto mayor pa medio di reparatieoeslag. Esaki ta un punto cu ya caba e gabinete a duna e prome stap pa logra cu e aumento di 250 florin pa luna di e reparatietoeslag cuminsando desde 1 di mei 2025.

Ademas di esaki, e plan di gobernacion ta inclui como punto di prioridad atencion special pa e adultonan mayor y esunnan vulnerabel den comunidad. Y alabes tambe kier sigura cu pueblo por haya e remedinan cu e tin mester pa cuida su salud, pa por haya consulta cu specialista mas lihe y haya un cuido medico profesional y completo atrobe.

Otro tema cu tin prioridad den e coalicion aki ta modernisacion di e sistema di educacion dunando prioridad back na enseñansa di calidad pa tur alumno, studiante y maestro. Gabinete AVP-FUTURO kier crea acceso tambe pa ‘young entrepreneurs’ den e sector di FinTech pa desaroya comercio digital local y internacional pa asina conecta Aruba na e miho plataformanan digital di mundo.

Otro punto di atencion inclui den e plan di gobernacion 2025-2028 ta pa elimina condicion y procedura inhusto pa por yega na vivienda pagabel, y tambe duna prioridad na renobacion di bario y centronan di ciudad cu espacio pa naturaleza, recreo y deporte cu ta brinda ambiente agradabel pa tur.

E plan di gobernacion ta duna atencion tambe na e renobacion di San Nicolas y Oranjestad y ta mira pa stimula esaki activamente cu inversion y oportunidad pa tur/

Gabinete AVP-FUTURO tin como meta importante tambe preserva Aruba como un luga caminda e personanan tin gana di biba y lanta nan famia, den un ambiente di trankilidad y seguridad. Nan kier traha pa haci Aruba un pais cu ta ofrece oportunidad y perspectiva igual pa tur y cu proteccion pa naturalesa y cultura, y alabes continua cu e proceso di transicion di energia fosil pa energia renovable;

Fortifica e relacion cu Hulanda tambe ta di suma importancia y den esaki ta mira pa crea un sinergia entre desaroyo na Aruba y e relacion strategico cu Hulanda, Union Europeo y cu region di Caribe.

E prome capitulo di e plan di gobernacion ta trata e tema di calidad di bida na Aruba. E documento ta remarca cu un tarea esencial di Gobierno di Aruba ta pa contribui na mehoracion di calidad di bida di tur hende cu ta biba na Aruba, pero esey no ta nifica cu tur hende lo tin e mesun salario of e mesun cantidad di rikesa material. Pues semper tur hende ta keda cu e responsabilidad pa nan propio bida.

Loke si e ta nifica, e documento ta indica, ta cu ningun hende na Aruba tin mag di biba bou di un nivel di bida material of social digno, of tin menos oportunidad y perspectiva pa mehora nan calidad di bida of cu nan bida ta destrui pa motibo di un of otro calamidad personal of den famia, sin cu tin e man di e “bon gobierno” pa yuda.

Den nan plan di gobernacion Gabinete AVP-FUTURO ta subraya cu e tarea di gobierno ta pa crea oportunidad pa tur hende tin un calidad di bida digno. Nan ta splica cu esey ta nifica cu na tur momento den bida, pais Aruba ta ofrece oportunidad pa cada persona capacita su mes y yuda su mes y su famia pa yega na un miho calidad di bida. Specialmente e gruponan cu ta rekeri atencion adicional.

“Pa e motibo aki nos pais lo sigui crea e instrumentonan legal, material, structuranan fisico y organisatorio pa cuida nan. E responsabilidad di gobierno semper lo ta pa crea e oportunidadnan, e circunstancianan y condicionnan mas favorabel pa tur hende por uza nan propio capacidad pa yuda nan mes y nan famia bay dilanti, cu e confianza cu semper lo tin un gobierno cu e boluntad y e organisacion pa yuda tur cu tin mester, pa no cay atras, pero semper bay dilanti. E ta e tarea moral husto di un gobierno cu ta traha pa tur hende, independiente di nan rasa, sexo, politica, religion of condicion financiero, sin kita e responsabilidad di cada persona. E responsabilidad moral aki di yuda y cuida otro tin hopi diferente origen.”

Gabinete AVP-FUTURO ta enfatisa cu for di un responsabilidad moral y humano, e ta scoge pa yuda crea e structuranan legal, fiscal, educativo y material, pa crea e comunidad den cual un ta cuida otro y, ora mester, tin un gobierno cu ta yuda cuida esunnan cu tin mester di ayudo.