Encuanto e plan di formacion nobo pa atende cu e situacion interno di e personal den KIA, Minister di Husticia, Andin Bikker (POR) a bisa cu esaki ta mas bien un plan di reorganisacion cu ta andando for di 2012.

Segun e mandatario, nan a logra avansa hopi cu e plan aki y aworaki nan a warda dos siman riba contesta di un sindicato cu a afirma cu ta di acuerdo cu e ultimo concepto di e plan aki. El a gradici e sindicatonan TOPA y SEPPA pa asina nan por avansa cu e proceso aki.

Ultimo dato cu e mandatario tin riba e plan di formacion nobo ta, cu nan ta ocupa cu e structura di funcion pa determina kico ta e salario pa e diferente funcion. Pues nan ta den e penultimo fase di henter e proceso aki pa e por bira un realidad. “E ta bayendo den un bon direccion,” el a bisa.

Un KIA nobo
Igualmente considerando e situacion deteriora y anticua di e instituto coreccional aki, un plan concreto di e mandatario ta pa explora e construccion di un KIA nobo, y parlamento a yega di sostene e plan aki.

Sinembargo debi na e cuadro financiero limita di gobierno, den conseho di minister nan a dicidi di bin cu un ‘Request for Expressions of Interest’ pa asina scucha e diferente proposicion y kico e mercado tin di ofrece pa bin cu un KIA nobo. Asina nan por tin un idea di e costo di un proyecto di e embergadura aki y asina nan por sinta cu CFT y busca e manera con pais Aruba lo por carga un proyecto asina financieramente.

Tambe a manda un carta pa Hulanda pa informa gobierno di Reino riba e necesidad pa bira realidad e plan aki. Pero mirando cu un plan asina por tuma su tempo prome cu e por wordo concretisa, minister Bikker cu presencia di un arkitecto local a declara ayera cu nan lo evalua con lo por reenforsa e infrastructura actual di KIA. Tambe lo kier haci uzo di mas instrumento tecnologico y explorando otro aspectonan entre otro cu drone pa reenforsa e siguridad den KIA.

E plan ta encera un edificio nobo na Barcadera, dentro di e area industrial, di 14.459 m2 di construccion, riba un tereno di 90.000 m2. E facilidad nobo lo duna acomodacion na un total di 349 preso.

E proceso di REOI ta core te cu fin di september 2019. Despues na october ta sigui e proceso di analisis di e propuestanan ricibi, pa despues den segundo mita di october te cu fin di november di e aña aki emiti e ‘Invitation for Request for Proposal’y ricibi reaccion di oferta riba esaki.

E proceso di construccion ta programa pa tuma aproximadamente 20 luna, pa keda cla pa december 2021. Mantenemento, seguro y gastonan di utilidad lo core pa un periodo di 30, te cu 35 aña.