Ayera mainta durante conferencia di prensa di gobierno, Minister di Economia, Comunicacion y Desaroyo Sosotenibel, Geoffrey Wever a elabora ariba plannan cu tin pa desaroyo di economia pa San Nicolas, enfoca ariba Orange Economy.

Minister Wever a splica cu en conexion cu maneho y vision pa loke ta desaroyo economico di San Nicolas, Gobierno di Aruba hunto cu Departamento di Asuntonan Economico ta bay realisa un serie di tayer, ‘Creative Entrenpreneurship Workshops’.

E tayernan aki, el a sigui splica, ta parti di e vision general mas grandi cu tin pa San Nicolas cu ta inverti tambe fuera di infrastructura, den mehora y drecha e area, y tambe ta percura pa inverti den capacity building (creacion di capacidad) di e hendenan den San Nicolas cu tin kizas ideanan den e mundo creativo. Ta trata di un serie di 12 programa di training pa empodera esnan cu tin bon idea pero cu no ta empresario ainda

“Como parti di nos maneho economico nos kier stimula mas persona pa bira empresario, nos kier yuda nan cu e hermentnan necesario pa converti nan ideanan y haci esaki negoshinan viabel y pa e motibo ey a organisa un ‘Creative Entrepreneurship Workshops’ na San Nicolas,” el a indica.

E mandatario a remarca cu gobierno tin e responsabilidad, ora ta papia di desaroya economia, pa desaroya areanan y pa mesun motibo nan ta pensa riba e personanan cu ta biba den e area, personanan cu semper ta parti di e area, manera esnan cu ta biba den San Nicolas.

E serie di tayernan aki ta bay siña e participantenan, entrepreneurs y futuro empresarionan con pa maneha diferente aspecto di un negoshi of con pa pasa di un idea pa un negoshi solido.

Minister Wever a agrega cu capacity bulding ta keda algo importante. Y aunke por inverti den infrastructura, por trece negoshi, for di su punto di bisa e parti mas importante ta pa e personanan local por bira empresario y por busca un manera pa bay dilanti.

“Esey ta parti di e vision cu nos tin y e maneho cu nos ta hibando. E proyecto aki ta parti di un vision mas amplio, no ta solamente e parti di workshops, pero nos tin diferente actividadnan pa loke ta e desaroyo y stimulacion di e concepto di Orange Economy,” el a indica.

Minister Wever a splica cu e concepto aki di Orange Economy ta uno cu den diferente ciudad rond mundo ta wordo pusha pa asina crea un desaroyo economico y pone mas enfasis ariba e cultura y historia, riba e arte, e autenticidad di un area. “Nos ta kere San Nicolas ta perfecto pa esaki y ya caba ta liderando riba e tereno aki cu diferente iniciativa cu tin pariba brug,” el a resalta.

Directora di Departamento di Asuntonan Economico, Sra. Maria Dijkoff-Pita, tambe tabata presenta na e conferencia di prensa y a ratifica cu den cuadro di loke ta e vision pa desaroyo economico di San Nicolas, Departamento di Asuntonan Economico ta apoya Minister Wever cu preparacion di diferente actividadnan cu lo cuminsa y cu lo wordo implementa durante 2024.

“Nos ta cuminsa cu un plan di desaroyo pa loke ta e industria creativo, Orange Economy, specificamente den e area di San Nicolas y esaki ta bay tin diferente actividad y ta cuminsa cu e workshop pa entrepreneurnan den e area creativo,” Pita-Dijkhoff a indica.

El a splica cu ta bay tin diferente experto di sector priva cu tin conocemento sea den e parti financiero, business planning, marketing y experiencianan den e mundo creativo en general. El a agrega cu ta bay tin tambe representantenan di diferente departamento di gobierno cu lo brinda conseho y tips con por maneha un negoshi den un manera mas eficiente y efectivo.

Respondiendo pregunta di miembro di prensa tocante espacio pa e desaroyo aki, Minister Wever a splica cu den area pariba di brug tin hopi edificionan bandona, hopi espacionan cu por wordo y reusa y esey ta haci cu tin hopi mas oportunidad den e area aki.

El a sigui splica cu nan a yega na e concepto aki pa stimula y wak kico otro ciudadnan a haci, por ehemplo na Medellin, y otro ciudadnan cu ta usa e concepto di Orange Economy pa crea full un desaroyo.

El a remarca cu den un economia asina tin hopi hende ta participa y hopi hende local tambe ta participa cual, el a resalta, ta e enfoke cu nan tin cu ta percura pa e desaroyo aki ta pa e hendenan pariba di brug y cu nan por participa den esaki.

“Tin espacio fisico, tin hopi conocemento, hopi habilidadnan, tin hopi hende pariba di brug cu tin talento y nos ta kere cu tipo di proyectonan aki por yuda algun bira empresario y mi ta kere tin espacio pa esey ainda,” el a enfatisa.

Por ultimo, e mandatario a indica cu aña pasa nan a desaroya un prome proyecto cu nan ta preparando pa wordo ehecuta pa pariba di brug caminda cu fondonan a wordo aloca y aña pasa a haci e prome compra di material pa por haci e desaroyo ey, cual tabata parti di presupuesto di aña pasa. Cu aprobacion di e presupuesto nobo fondonan nobo a wordo aproba pa por sigui inverti den e proyecto pa San Nicolas.

“Nos ta den combersacion continuamente cu entre otro RdA y otro entidadnan cu ta stakeholders, manera WEB, Elmar, Utilities, DOW, DIP. Tin un comision ta trahando di aña pasa caba haciendo diferente analisis y calculacion pa wak con por realisa e proyecto aki den 2024 y ta premira cu den e prome cuater lunanan di aña e proyecto lo cuminsa,” e mandatario a finalisa.