(NLTimes)—E medidanan cu Minister di Clima, Rob Jetten (D66) kier tuma pa haci trafico automotivo mas sostenibel mas lihe tin poco chens di garna apoyo for di otro partidonan di coalicion, segun fuentenan cerca di Gabinete a bisa. A puntra nan tocante un reportahe similar for di locutor NOS ora nan a indica cu tabatin un division den Gabinete.
E propuestanan di Jetten ta inclui haci obligatorio cu gasolin bendi na stacionnan na Hulanda sea un mescla di gasolin sostenibel y mas caro, cual por aumenta e prijs di gasolin mas ainda y pues demotiva uso di auto. Esaki por pasa otro aña mes. Despues pa 2025, e interes di BPM riba autonan nobo di gasolin y diesel por aumenta hopi lihe, cu e potencial pa bira dobel di loke esaki ta awo. Jetten kier tuma un decision riba e asunto aki dentro di un par siman.
Un debate parlamentario cu a tuma luga dialuna a mustra caba cu e miembronan di coalicion ta dividi tocante medidanan di clima adicional cu ta necesario pa logra cu e acuerdo di e coalicion pa reduci emision di carbon. Miembro di parlamento, Raoul Boucke (D66) a bisa cu su partido “no tin taboo” ora ta trata e combatimento di cambio di clima. Pero VVD, CDA y ChristenUnie a anuncia caba cu nan no por apoya medidanan cu ta haci bida di hende na Hulanda mas caro, parcialmente pa via di e consecuencianan di e guera na Ucrania.
Asina mes, Jetten kier sigui cu su plan. Fuentenan a confirma cu Jetten di berdad a pone su propuesta riba mesa. Pero tambe nan a bisa cu su coleganan a bis’e cu e no ta bay haya apoyo di nan. No tabatin un discusion, pero esaki tabata un “combersacion dificil,” segun un fuente a bisa.
E posibel medidanan automotivo mester forma parti tambe di un pakete grandi pa haci industria, agricultura y hogarnan mas sostenibel mas lihe posibel. Jetten a bisa dialuna caba cu husticia y un bon balans den e distribucion di beneficionan y desbentahanan ta esencial. En particularmente, no mester stroba ciudadanonan.
Cualkier empuhe pa aumenta prijs di gasolin ta bay trece daño na miyones di empleado, segun sindicato CNV a declara. E sindicato a pidi pa e plan cancela, mirando cu esaki por costa empleadonan un extra 100 euro pa luna, asina president di CNV, Piet Fortuin, a bisa.
Autonan ainda ta necesario pa mas cu 60% di hende pa yega nan trabou, CNV ta sigui splica. Autonan electronico ta hopi caro pa e mayoria di hendenan na Hulanda cu ta traha y p’esey nan ta depende riba autonan di gasolin of diesel. “Nos tin tempo caba ta argumenta pa un salario di biahe mas halto,” Fortuin a bisa. Na dado momento, nan ta bay yega na un limite si Gabinete sigui riba e caminda aki, el a argumenta.
Desde e aña aki, e salario di biaha sin impuesto a subi pa 21 cen pa cada kilometer. “E prijs mas halto aki claramente ta bay wordo contradicta si Gabinete haci gasolin y diesel mas caro atrobe. Si Gabinete hisa e prijs di gasolin atrobe, e ora ta necesario pa empleadonan mester haya un compensacion adecua.”
