Mientras ta parce cu tur cos ta ‘color de rosa’ den e proyecto di reapertura di e refineria, ta cuminsa sali señal di un ‘Plan B’ na San Nicolas, por si acaso no tin refineria mas. Esey riba su mes no ta algo malo; den tur cos mester elabora alternativa den caso cu e plan original no cristalisa. Y den e asunto di e refineria tin suficiente motibo pa pensa riba un plan alternativo.
Pa cuminsa, a pesar di tur e afirmacionnan di parti di gobierno cu tin un acuerdo y cu yegada di Citgo ta sigur, a sali den noticia internacional suficiente indicacion cu no tur cos ta canando manera gobierno ta pretende. E dudanan a cuminsa di biaha ora cu gobierno a anuncia, cu a yega na un acuerdo. Durante e rueda di prensa mes a haci pregunta tocante e altura di inversion den rehabilitacion di e refineria, unda ministro encarga cu Asunto Economico no por a duna cifra exacto. Mas interesante tabata cu el a declara cu ta awor no mas, desde 1 di augustus, Citgo lo bin haci su investigacion detaya pa ‘assess’ kico e rehabilitacion lo bay costa… Anto nos mester kere cu Citgo ta cana drenta den un aventura cu nan no sa unda e ta cuminsa ni unda e ta caba?
No ta straño cu a bin noticia di e parti Mericano di e gerencia di Citgo cu tabata sumamente rabia cu e deal aki, cu por trece e compania den problema financiero serio, sin cu e ta inverti den su ‘core business’. Manera nos a comenta anteriormente, e prestamonan biyonario di ultimo aña pa pasa placa pa PDVSA y gobierno Venezolano a laga e compania caba sin espacio pa fia mas. Banda di esey a cuminsa sali diferente comentario tocante e estado di deterioro di e refineria, cu por haci cu e gastonan di rehabilitacion lo ta hopi mas halto cu ta calcula te awor. Hasta si bao presion Venezolano Citgo yega na firma cu Aruba, e pregunta ta keda si e rehabilitacion ta factibel financiero y tecnicamente. Por observa cu PDVSA mes ta den problema asina serio, cu nan no por ni paga e carga cu barconan ta treciendo Venezuela na e momento aki y preocupa cu Aruba lo no ta riba nan agenda.
Pero loke mas a hala nos atencion ta e noticia cu Prome Ministro a anuncia na un medio di comunicacion local, cu banda di e parti di e tereno cu e refineria ta ocupa, tin un tereno grandi entre e tankinan na Zeewijk y haf di San Nicolas, cu tin acceso na costa y cu gobierno lo haya esaki pa desaroya algo diferente. Esaki ta netamente e tereno cu den e plan alternativo cu Camara di Comercio a presenta algun aña pasa, unda a mustra riba e posibilidad pa establece un haf di container internacional aki, cu tin tur e posibilidadnan cu e haf di Barcadera no por brinda nunca, simplemente pasobra e ta demasiado chikito. Tambe nos a publica algun tempo pasa cu Citgo a lanta un compania local cu tin den su metanan pa bira e autoridad portuario na San Nicolas, pero alabes a pone den su metanan cu e por bay haci negoshi di importacion y exportacion di container pa tercera persona. No a bin ningun reaccion di parti di gobierno riba e asunto aki. Aparentemente tin mucho mas ta bay sucede cu solamente reapertura di e refineria. Asina Prome Ministro a papia tocante un proyecto di panel solar cu por haya su luga na e parti mas cerca di Sero Colorado cu tambe gobierno ta haya pa desaroya.
Nos ta cuminsa haya e impresion cu tin dos plan ta coriendo pareu: un cu refineria y un sin refineria. Den e ultimo version e refineria lo keda desmantela loke pa basta tempo ta duna trabao pa varios contratista, cu gobierno ta scoge… Loke ta parce crucial den henter e asunto no ta si e refineria ta habri of no, pero si ta logra firma e acuerdo cu Valero pa gobierno haya e propiedad den su totalidad. No ta bisa cu esey de por si ta algo negativo, pero nos no ta mira pakico mester tin tanto secreto asina riba algo cu por discuti abiertamente. Talbes e problema ta cu a palabra un cantidad di cos cu partnernan tanto local como internacional pero no kier divulga ainda; esey no lo ta nada nobo pa e gobierno aki. Con tal cu ta cuminsa parce cu e asunto di Citgo ta birando mas y mas un cortina di huma grandi pa sconde loke ta bay tuma luga di berdad.
Por ta tambe cu e reservacion di tanto camber di hotel all-inclusive den e cambio di ley proponi pa ministro encarga cu turismo no ta pornada y tin di haci cu un continuacion di e plannan na Sero Colorado, si e acuerdo cu Citgo a lo largo resulta no factibel. Un gran parti di e cambernan lo bay anto pa realisa e proyecto di Bahia. Nos ta keda pendiente.
