Placa normal y extra a bay pa cuenta di Serlimar caba: Bewindvoerder ta dicidi riba suma transferi

Ayera trahadonan di Serlimar a bay den accion pasobra placa no a drenta den cuenta di e compania Sui Generis aki, pa paga nan compromiso cu nan trahadonan entre nan di vakantieuitkering.

Minister di Finanzas y Asunto Economico, Xiomara Maduro a bisa cu gobierno a cumpli y e placa a wordo transferi riba cuenta di Serlimar SG. El a declara na Bon Dia Aruba cu tabata dos transaccion. Un di 1.7 miyon cu ta esun normal y tambe un 1.3 miyon cu ta un suma extra.

Encuanto e destinacion di e dos suma cu gobierno a transferi e mandatario Ruiz-Maduro a bisa con Serlimar ta us’e ta prerogativo di Serlimar mes. Pero como cu nan ta bao suspension di pago esaki kiermen cu den practica ta mr. Geert Rep ta dicidi riba uzo di e suma cu gobierno a yega di deposita caba riba cuenta di Serlimar.

Mirando e accion di e trahadonan di Serlimar, el a aclaria cu: “Minister Maduro no a wanta niun placa.” E mandatario a declara cu Serlimar tabatin e placa cu ta den nan cuenta for di diaranson. E ta haya cu ta Serlimar mes ta esun cu mester splica pakico no a paga e trahadonan diaranson. Of si tabatin algo otro cu a impedi nan di por a paga cu a resulta cu ayera mainta tabatin un manifestacion di e trahadonan.

Como minister encarga cu Finanzas e placa a wordo transferi pa e cuenta di Serlimar. Pero e mandatario a bisa cu e no ta atende cu e cuenta banco di Serlimar. Pero esunnan cu ta atende cu e cuenta aki tin cu percura pa cumpli cu e pago di e trahadonan.

Ta bin acerca si cu Serlimar ta bao suspension di pago. Ta nan bewindvoerder esun cu final di dia ta dicidi kico ta wordo haci cu e placa transferi caba. Pues e ta haya cu di su parti como minister di Finanzas el a cumpli, y ta Serlimar esun cu mester atende awor cu e pago cu e trahadonan ta exigi.

E suma extra aki gobierno a concorda hunto cu mr. Geert Rep. Tambe cu director di e compania, Sr. Koopmans y minister encarga cu Serlimar, Marisol Lopez-Tromp. Den un memo dirigi na tur empleado diamars ultimo, director di e compania estatal a informa cu nan ta na espera di e sumanan extra di gobierno pa atende cu su compromiso cu nan trahadonan, entre nan salario, pero tambe pago di vakantieuitkering cu ta esun cu e trahadonan ta reclama.