– Algun luna atras Bon Dia Aruba a haci un encuesta den Caya Betico Croes anto combersa cu varios comerciante riba entre otro poder di compra y nan pensamento riba algun otro preocupacionnan. E biaha aki, nos a bishita algun negoshi local pafo di Caya Betico Croes cu ta remarca cu nan tambe ta sinti efecto di e economia y varios di nan lo por ta kisas cera mes si nan no lo tabata tin clientenan regular.
Aruba tin varios negoshi rond di e isla cu ta ofreciendo nan servicio pa basta aña te hasta decadanan, sinembargo, pa hopi di e comerciantenan aki cosnan no ta mescos cu antes. Tuma por ehempel Shatri Jewelry & Accessories na Belgiestraat cu segun gerencia, e negoshi ta existi pa 30 aña caba.
Den e edificio actual caminda cu nan ta situa na Belgiestraat nan tin mas o menos 20 aña caminda nan a cuminsa como un joyeria. Despues cu joyas a cuminsa cay den e mercado, Shatri a bira un boutique.
Gerencia di Shatri ta relata: “E boutique tabata bay hopi bon pasobra nos tabata pafo di caya, nos tabata haya hopi local cu tabata bin cerca nos. Pero den e ultimo cinco aña nos bentanan a baha hopi.”
Shatri ta sufriendo di un caida den benta di 20% anto den nan caso, nan ta opina cu esaki tin di haber cu e placa no ta circulando. Sra. Greta Posner – Figaroa, directora y doño di Giselle Department Store na Noord ta splica Bon Dia Aruba cu: “Nos ta sinti efecto di e koopkracht masha hopi mes cual pa nos a cuminsa for di aña pasa poco pisa pero e aña aki hopi mas. Mi no sa si ta hende in menos placa pa gasta, ta gasta placa na otro cos cu no tin mester manera bay sali pero nos clientela a keda mescos.” Na Giselle Department Store, un negoshi cu a caba di haci 35 aña di existencia den Augustus, antes cliente tabata cumpra 300 florin di articulo cu awor a baha pa 200 of 150.
Paña a bira un luho
Algo cu dia pa dia ta birando pio segun varios otro comerciante tambe por a comparti cu Bon Dia Aruba, ta e hecho cu nan ta sinti efecto di poder di benta cu a bay hopi atras. Bida a bira cu e cosnan principal ta bin prome manera awa, coriente y despues ta bin luga pa un luho. Antes por ehempel joyeria tabata un luho pero segun comerciantenan ta remarca, awo hasta un paña, tas y sapato a bira un luho y nan ta keda na e ultimo luga. “No tin poder di benta. Antes clientenan tabata drenta y cumpra tres pa cinco articulo pareu. Aworaki nan ta bin anto nan mester check nan budget, check esaki anto check esey pa nan bay cumpra porta 1 paña. Nan ta pasa wak prijs anto el a djis bira hopi dificil,” gerencia di Shatri ta comenta. Tin varios boutique chikito cu ta habri mas tanto den temporadanan di fin di aña pa un periodo di dos of tres luna anto esey segun gerencia di Shatri ta caba cu bo mercado. Por ehempel hopi hende cu ta bin di afo, bende nan mesun cas of pone riba credito y esaki ta causa cu negoshinan manera Shatri ta tog perde clientenan cu tabata ‘walk in’.
Bon Dia Aruba a bishita algun comerciantenan na Ponton cu tambe ta sinti cu poder di benta ta hungando un rol grandi no solamente den caida di benta den caya principal, pero pafo di esaki tambe. Un comerciante na Ponton Shopping Center ta comenta cu: “E economia di e isla mes ta hungando un rol pues algo mester wordo haci cu esey. Mi tin clientenan regular y nan ta hopi honesto tambe pues nan ta bisa mi cu nan no tin placa awo pues nos ta discuti riba e cosnan aki cu e clientenan. Bo ta ripara den comparacion cu dos aña pasa, e benta ta otro, el a baha.”
Apoyo na negoshinan chikito
Na Merca ultimamente nan tabata tin un ‘Small Business Saturday’ anto esaki ta algo cu ta yuda comerciantenan local pa wordo conoci den e comunidad y apoya nan negoshi. Esaki ta algo por ehempel cu comerciantenan ta haya falta di dje aki na Aruba cual ta algo importante. “Mi ta ripara cu tur cos eigenlijk. Hendenan por keha riba prijs pero honestamente e costonan di invoerrechten ta hopi halto,” comerciante na Ponton Shopping Center ta comenta. E comerciante ta agrega cu por ehempel riba e asunto di impuesto, pakico no haci algo cu e porcentahe of un ‘vast bedrag’ pa henter e isla of algo pa yuda e negoshinan chikito un tiki mas. Presidente di Kvk , Sra. Daphne Lejuez ta bisa: “Cos no ta bayendo bon den general anto esey nos sa y por wak den e cifranan di Centrale Bank. Pero den otro banda mi lo bisa cu den comparacion cu Caya Grandi, esnan pafo mi ta kere ta tog bayendo un tiki miho.”
Cifranan di Central Bank
Segun Sra. Lejuez, locual e cifranan di Centrale Bank ta indica cu e ‘invoer’ ta abao pues esey kiermen cu bo no tin ‘afzet’. Esaki kiermen cu tiendanan no ta bestel mas tampoco pasobra ningun hende no ta cumprando anto esey ta un indicacion fuerte cu e poder di benta ta abao. “Tin hende ta kies kico nan ta cumpra, nan ta cumpra Online of ora nan bay riba vakantie dus tur esakinan tambe ta hungando un rol, pues con hende ta haci compras awendia,” Sra. Lejuez ta subraya. Pa haci e cada bes mas caro pa negoshinan por bende nan productonan no ta algo cu ta yuda segun KvK pasobra nan no por competi cu por ehempel un Amazon of Ebay. Ta casi un 30.000 persona ta inscribi pa e servicio di post na Post Kantoor anto ta exactamente e diferente factornan aki cu ta hungando un rol den poder di compra na Aruba. “P’esey nos ta keda boga pa baha e costo di haci negoshi, tur e gastonan ta keda subi y acumula haciendo e producto mas caro y hopi mas dificil pa e persona local por competi.” Minister di Financia aña pasa tabata papia di un opcion pa purba standarisa locual bo ta paga, elimina BBO, pag’e vooruit y esey ya caba lo yuda standarisa cierto prijsnan pero aworaki segun KvK e situacion ta djis hopi dificil.
