Parlamentario Endy Croes (MEP) a bisa cu haciendo uzo di su derecho como parlamentario a bin cu preguntanan por escrito riba algun proyecto unda a wordo gasta sumanan substancial pa faborece un grupito. Pero tambe pa adkiri informacion pa nan ta na altura kico ta pasando den e caso aki cu Lotto pa Deporte, pero tambe e comision di subsidio pa deporte.
El a referi na e magazine Aruba Dushi Tera caminda a wordo publica 15 mil ehemplar pa un ‘suma cuantioso’, segun e parlamentario. Parlamentario Croes a mustra un documento cu un stempel ariba pa demostra cu nan a manda puntra e mandatarionan di e gabinete actual riba e gasto aki pero tambe riba e auto di carera di un ruman di ex prome minister Mike Eman cu tabata ‘haya un sponsorship basta grandi’ di ATA y Triple A.
Cu esaki e kier demostra su malcontento cu no ta posibel cu placa di pueblo ta bay pa un grupo chikito, y mientras tanto pa ehempel nos tin un Palo Marga cu ta sufri y no ta haya e ayudo cu mester haya.
Comision di Subsidio
Tambe parlamentario Endy Croes a bisa cu den nan trabou como parlamentario nan a pidi e statuto di e comision di subsidio cu a bira for di september un stichting. E ta relata cu antes minister tabata nombra un comision di 5 persona cu ta envolvi diferente instancia entre nan ASI, COA, Lotto pa Deporte y un persona di su propio oficina. Kiermen Lotto Pa Deporte ta percura pa duna fondo na e comision di subsidio y gobierno ta aloca un parti chikito pa mas cu 24 federacion deportivo ta bin den titulo pa haya subsidio of fondo pa nan actividadnan.
Pero e ta mira cu den e statutonan aki tin cambionan cu awendia tin un Raad van Toezicht cu ta nombra un of mas miembro di e directiva entre nan un director. Nan ta compronde cu actualmente e director ta Tito de Cuba y tambe un abogado Deta Henriquez, asina el a indica. Pero den e nombramento aki -segun e parlamentario- e articulo 7 di nan statuto nobo ya caba ta saca tur e poder ehecutivo for di man di minister.
“Kiermen nan ta cambia statuut y nan mes ta nombra hende”, segun parlamentario Croes.
Tambe el a referi na articulo 9 di nan statuut, caminda ta para cu e minister por escrito ta ricibi e candidatonan di ASU y COA, y e mandatario ta wordo limita pa bisa “solamente si.” E ta haya cu na final di dia e comision aki cu a bira ‘autonomo’ ta esun cu ta bay percura ken ta bay haya fondo of subsidio si of no.
“Mi ta kere cu den cualkier pais decente, manera esaki a bay, mi no ta kere cu ta e forma mas corecto”, el a bisa. Segun e parlamentario Croes ya caba el a trece e punto aki cerca e minister di Deporte. Tambe el a indica cu tin un plan caba den caso cu no por yega na un ‘areglo descente’ riba e comision di subsidio. Ya caba a wordo proponi pa lanta otro comision cu lo yama Fondo Nacional Deportivo.
Segun e parlamentario e nomber aki ta poni riba mesa caba. Den dado caso cu no por bin na un entendimento of un cambio riba statuut di e comision di subsidio, el a anuncia cu lo sosode dos cos: E prome lo ta cu Lotto pa Deporte cu ta esun cu ta pone e placa den e comision di subsidio ‘lamentablemente si no tin entendimento’ e placa ey lo wordo lo wordo poni den e comision nobo Fondo Nacional Deportivo.
E ta spera cu e actual directiva di comision di subsidio pa deporte por entrega nan retiro y traspasa nan funcion na un manera decente na e minister di Deporte. “Pero si no ta asina e ora mester ehecuta tambe e plan B”. E ta referi cu e plan B tin di haber ariba loke ta regarda e comision di subsidio.
Pa loke ta Lotto pa Deporte, e parlamentario a indica cu un luna despues di eleccion e hunta directiva di e fundacion aki a bin cu cambionan riba nan statutonan. Esaki a keda aproba y firma pa e minister anterior Alex Schwengle y ex premier Mike Eman, el a bisa. Den e caso aki e ta haya cu esaki tambe ta contra tur ley, ya cu nan a bin cu cambio riba nan statuto pa nombra un director pa ‘tempo ilimita’.
E ta haye straño cu e mesun presidente di e fundacion aki, Stephano Wernet ta esun cu a wordo nombra como e director nobo pa Lotto pa Deporte pa un tempo indefini den su contract. El a bisa cu nan a pidi e contract pa parlamento por dispone di dje y cana e caminda corecto.
