A pesar cu tin un luz den final di e tunnel pa atende cu e exigencianan di e docentenan di scol Pius X; cabesante di e scol aki, Sheila Tromp a expresa un serie di preocupacion cu nan mester atende ainda.
E cabesante ta aprecia cu e accion di e maestronan a haya atencion tanto di e directora di SKOA, minister di Enseñansa y personal di DOW. Sinembargo un di nan preocupacionnan tin di haber cu aunke for di diamars ultimo personal di DOW a cuminsa cu e trabou di drecha e bentananan y portanan, ainda tin problema. Ayera nan no por a cuminsa duna les pasobra e situacion ta sigui practicamente igual.
Ainda no tin un decision concreto si scol Pius X lo sigui opera normal te cu fin di aña escolar awor. E departamento di Inspeccion di Enseñansa tambe mester cay aden riba e decision aki. Ta existi e posibilidad cu na momento cu personal di DOW ta trahando, nan ta cera scol pa un par dia y despues nan ta habri e scol bek. E locual mas ta preocupa nan di e situacion ta nos clima cu na un momento pa otro ta cuminsa yobe, y e situacion cu esaki lo por trece ora cu no tin bentana pa cera e lokaal.
Nan ta trahando un plan como scol cu lo keda entrega na e mandatario di Enseñansa, ya cu niun momento e muchanan mester keda perhudica. “Como scol nos kier carga esey tambe”, el cabesante ta bisa. Pero nan no ta haya adecuado cu mientras trabou grandi ta tumando luga den scol e muchanan ta keda rond na scol. P’esey e docentenan ta trahando riba e planificacion pa termino di aña y pa cuminsamento di aña escolar 2017-2018. Unabes cu nan a entrega nan proposicion, nan ta spera un pronto contesta di parti di minister di Enseñansa y di SKOA.
DOW mester duna conseho na minister Michelle Hooyboer-Winklaar pa atende cu e situacion aki.
Tanto e cabesante como e docentenan ta di opinion cu mester cambia tur e bentananan ya cu for di antemano nan a yega di expresa esaki debidamente. Nan ta puntra nan mes si cambia e bentananan completamente no ta ekivalente den costo na drecha e bentana y pone airco pa scol. “Nos no ta experto pero si nos ta esun cu ta sinta henter dia eyden”, el a bisa.
Solucion di airco
Mayornan di e muchanan no por carga e gastonan envolvi pa bin cu un sistema di airco pa henter scol, p’esey nan tin cu pensa riba otro solucion creativo cu nan por yuda e mayornan carga esaki batiendo na porta di companianan priva generoso of organisa actividad pa recauda fondo. “ Nos ta di opinion cu no ta pasobra nos ta un scol di bario e muchanan no merece enseñansa di calidad tambe”, Sra. Tromp a bisa. E ta kere cu ta dificil di imagina e situacion aki cu e muchanan cu mester haya enseñansa y cu mester concentra nan mes y produci den un situacion dificil cu hopi calor ta suta nan.
Rol di SKOA cuestiona
“Si nos dicidi di kita tur mantencion for di SKOA, e ora ta cuminsa pensa den e direccion di ki rol SKOA como un directiva di scol ta hunga den esaki”, asina Minister di Enseñansa, Michelle Hooyboer-Winklaar a expresa.
Pa medio di un comunicado e minister di Enseñansa a bin cu un serie di pregunta: Ta keda un pregunta valido cu si ta Gobierno ta paga tur cos, kico ta e rol di SKOA anto? Kico SKOA ta haci cu tur e placa cu e ta haya pa mantencion y kico e ta haci cu e “schoolgeld” cu e ta cobra mayornan tur aña?
E ta haya cu mientras e den su rol di minister mester responsabilisa delaster un florin cu e gasta na Parlamento, pero SKOA ta keda añanan largo sin presenta nan cuentanan anual. Sin presenta cifranan y sin presenta un plan di maneho riba con ta mantene e scolnan cu e fondonan cu e ta haya anualmente for di Gobierno. Minister Hooyboer-Winklaar ta considera cu esaki ta puntonan cu lo bay delibera riba dje y lo ta bon pa envolve otro Ministerionan manera di Financia, Departamento Huridico di Gobierno (DWZ) y tur por yega na un formula cu por traha pa tur hende.
