Pitch Time ta busca hobennan cu kier ehecuta proyecto den nan mesun comunidad

Ayera den oranan di atardi, Cede Aruba a haci e lansamento oficial di e proyecto Pitch Time pa e aña aki na unda a wordo informa cu esaki ta un proyecto cu ta stimula liderazgo bou e hobennan na Aruba.

Asina a duna di conoce Daniel Tecklenborg director di CEDE Aruba durante un conferencia di prensa pa trece dilanti cu e proyecto cu a cuminsa na 2019 cu un exito basta grandi y na unda diferente companianan, fundacionnan y hobennan a uni pa haci proyectonan pa e comunidad.

Door di pandemia di Covid-19 cu a cuminsa aña pasa, Tecklenborg a bisa cu nan no por a haci e proyecto posibel pa via di restriccionnan pero na e momentonan aki nan a mira e oportunidad pa bin back cu e programa pa asina hobennan haya e oportunidad un biaha mas pa haci algo positivo pa nan mes y pa otro gruponan vulnerabel den comunidad.

El a menciona cu e meta di e proyecto aki ta cu nan kier crea un conexion valioso entre hobennan y tambe e proyectonan cu ideanan nobo pa haci algo pa e comunidad.

Na e momentonan aki, nan ta buscando hobennan lider cu tin ideanan pa actividadnan pa por ehemplo den nan bario, cu por ta pa otro hobennan pero tambe pa hende grandi of otro ideanan pa haci algo positivo.

“Esaki ta nos lidernan cu nos ta buscando cu tin e ideanan y nan hunto cu otro hobennan lo ehecuta nan proyecto”, Tecklenborg a expresa.

Tambe, nan kier yuda e hobennan aki pa nan hisa nan creatividad, nan habilidad di traha cu proyecto, nan hermentnan pa duna presentacion, comunica y lidera un ekipo cu otro hobennan.

Nan ta trahando hunto cu otro negoshinan segun loke Tecklenborg a menciona, pa asina den un tempo dificil nan ta contribui como sponsornan y duna e hobennan aki un chens pa haci nan proyecto, el a afirma cu nan lo tin 15 proyecto cu lo tuma luga den e siguiente lunanan pa traha e proyecto na base di ideanan di e hobennan mes.

Mester tene na cuenta cu e hobennan tin cu aplica na Cede Aruba, te dia 4 di juni tur hoben entre edadnan di 17 pa 24 por presenta nan ideanan via un video pa asina por splica kico e proyecto cu nan kier haci ta encera, nan mester duna un splicacion hopi cla tocante e actividad cu nan kier haci cu ta mas tanto actividadnan social, educativo, recreativo, tambe ta importante pa sa con lo envolvi otro hobennan den e proyecto.

Nan no kier mira proyectonan cu ta den un solo evento pero actividadnan cu ta ripiti nan mes y esey no por costa mas cu AWG 5.000, esaki por ta un tremendo cifra cu e cual e hobennan por traha cune, segun el a afirma.

Tecklenborg a señala cu e biaha aki nan ta traha cu hobennan so, den e version anterior nan a traha cu fundacionnan tambe pero mirando e circunstancianan di pandemia Covid-19 y e restriccionnan cu tabatin den ultimo aña, nan ta mira cu hubentud kier haci algo positivo y nan no kier limita nan di traha hunto cu un otro organisacion, “nos kier duna nan e chens di organisa algo y hopi cerca di nan cas”, el a declara.

Elsa Krosendijk a trece dilanti cu nan tabatin mas cu 28 proyecto cu a wordo inscribi na aña 2019 y nan ta espera cu nan por dobel e cifra aki y mirando cu hobennan a acerca nan pa presenta posibel solucionnan cu nan mester pa cu nan bario principalmente, cu tin e necesidad di haci algo den nan bario y ora ey nan a sinta hunto y a dicidi di bin cu edicion di bario e aña aki.

“Importante ta pa bo wak kico bo bario tin mester”, Krosendijk a sigura y tambe a bisa cu nan tin un grupo di 20 hoben cu ya caba ta den e trayectorio, cu nan a haya cursonan y cu nan por ta Youth Leaders, nan por mustra otro hobennan e sostenibilidad cu e proyecto lo por tin despues y cu por yuda nan bario sea cu e parti creativo, deportivo, hobennan cu talbes ta sinti cu den nan bario mester bin gruponan di support pa nan por papia cu otro y yuda un poco mas pa e mehoracion di e bario.

El a sigura cu cada un di e 15 hoben mester busca 10 hoben mas pa yuda den e proyecto y asina expande esaki den nan bario, “nos ta papiando di 150 hoben aproximadamente cu lo por haci algo hopi educativo pa cu henter comunidad”, Krosendijk a afirma.

Tocante e proyecto manera a wordo menciona caba, ta importante pa e hobennan graba nan video y uni hunto den grupo pa asina crea di un miho manera, si un hoben den un bario ta sinti cu kier haci algo productivo e tin te dia 4 di juni pa presenta e video ey cu a wordo graba horizontalmente di e proyecto y mand’e pa pitchtimearuba@gmail.com

Cada un di e proyecto lo haya un imput di e comerciantenan cu lo sponsor e proyectonan pa asina nan por haya un guia, nan mester ‘Pitch’ e proyecto na sponsornan na unda despues nan lo scoge cua ta e proyectonan cu nan ta kere cu por inverti den dje, segun Krosendijk a indica.

Despues di dia 4 di juni, e dia 7 di juni nan lo selecciona e 20 miho proyecto y cu despues lo scoge 15 di nan cu ta esun cu lo haya e placa pa e proyecto cu lo wordo ehecuta entre dos pa tres luna y na final di luna di october lo tin e showcase pa mustra kico tabata e proyectonan y con nan a cana.

Alexander Wever Youth Coach di Pitch Time a comenta cu su experiencia den e Pitch Time di aña pasa tabata un tiki diferente mirando cu 10 participante so por a gana y nan tabata mustra nan proyecto na e comerciantenan of companianan pa haya un donacion, cu nan mester a ehecuta e proyecto den un tempo di tres luna, e tabata representa e Fundacion Scubblebubbles na unda nan mester a planta coralnan den lama.

Kelsey Westerburger cu a gana e titulo di ‘Best Youth Coach’ na aña 2019 y el a afirma cu su experiencia den Pitch Time “tabata hopi amazing” na unda el a haya e chens pa traha hunto cu NGO’s y tambe directamente cu muchanan cu tabata den necesidad cu e proyecto cu nan tabata kier ehecuta, den transcurso di tres luna nan a traha hunto cu e hobennan y nan a logra un proyecto cu Centro Familiar Sabana Basora, el a finalisa.