Piscadonan di area di Waf’i Rancho tin lunanan cu preocupacion pa loke ta trata e futuro di e area aki, mirando e desaroyonan cu ta tumando luga.  Y ta p’esey cu diamars awor nan lo reuni pa trece dilanti un biaha mas nan puntonan y situacion cu ta presentando aworaki na e luga ey.

Clifford Rosa, presidente di Stichting Rancho a expresa pa Bon Dia Aruba cu desde 2018 nan a manda un carta pa minister Otmar Oduber, ken na e momento ey tabata representa e cartera di Infrastructura, Desaroyo Teritorial y Medio Ambiente, pa pone Gobierno na haltura di loke ta sosodiendo na area aki. Un carta cu segun el a afirma nan no a haya un contesta.

Na 2019 nan a manda un otro carta, pa asina cana e caminda huridico y cu tur esaki tin di haci cu ROP. Cu den dje tabatin e intencion di un parke marino, na unda Stichting Rancho ta representa e piscadonan y pa cu e desaroyo na rancho. Nan ta accentua cu semper nan tabatin nan area di piscado na unda nan tabata bende nan pisca, y e tradicion ey ta lo cual nan ta purba conserva.

Cu tur esaki, nan kier yama atencion di Gobierno y e minister encarga di esey, cu awo ta Marisol Lopez-Tromp y tur e persona envolvi den esaki, pa wak con nan lo haci’e pa motibo cu sector priva ta haci su trabou, pero nan no kier mira un desaroyado cu ta haci algo cu no ta na nan fabor. Pa via di esaki nan kier yama un otro reunion oficial cu e mandatarionan, “pasobra tin cierto decisionnan cu no por wordo tuma asina”, el a expresa.

El a splica cu desde algun tempo pasa a cuminsa desaroya y renoba e area di rancho, na unda e Waf’i  y pier ta keda. Esey a causa un movecion na unda e acceso a wordo limita, ta p’esey cu nan kier un clarificacion di parti di minister Lopez-Tromp, y no cu inversionistanan ni APA manera a wordo haci den varios reunion caba sin trece un solucion.

Pa cu esaki, el a bisa cu e parkeerplaats den area aki ta publico, pero pa via di construccion nan ta perdiendo espacio sin tene na cuenta e hendenan cu ta traha eynan y cu tambe ta bay cumpra pisca. E acceso pa e pier y bisindario a keda obstaculisa.

Den palabracion y riba papel ta wordo poni cu nan lo duna e piscadonan luga pa para nan auto y algun negociacionnan a tuma luga desde un aña caba, pero te ainda nan no por yega na otro.

El a declara cu si e piscadonan na e momentonan aki kier saca un boto, nan no por bay den tereno na unda e parkeerplaats ta, un luga cu supuestamente mester ta publico.

Tambe ta existi un incertidumbre door di e pier, manera Bon Dia Aruba a trece dilanti den un articulo casi un aña pasa. Esaki ta forma parti di e herencia cultural cu ta locual nan kier conserva. Rosa a comenta cu nan lo kier e maneho di Schoenerhaven y Markhallen cu ta e structura di e mercado di e area cu supuestamente aworaki ta bou maneho di Gobierno, pero nan no sa con esey ta, p’esey nan ta pidi pa nan por yuda den e maneho ey como fundacion.

Rosa a bisa cu nan ta haci un yamada pa e piscadonan di e area aki y comunidad pa mañan diamars desde 9or di mainta pa bolbe reforsa loke nan a dicidi y presenta pa Gobierno caba pa asina comunidad por compronde mas kico ta pasando den area.

“Nos no ta papiando di un protesta of manifestacion, nos kier clarificacion di kico lo pasa cu Waf’i Rancho”, Rosa a menciona.

Asina mes Rosa a informa cu diabierna ultimo nan a ricibi un carta for di inversionista na unda nan ta duna di conoce cu nan no kier tene problema of algun conflicto y nan kier sinta na mesa pa papia pero segun Rosa esaki ya tin tempo caba y nan no kier sinta mas cu e inversionista.

Di parti di Fundacion Rancho el a bisa cu nan scucha di nan banda pero cu mañan diamars nan por bin y scucha loke e piscadonan ta pidi y comunidad lo kier expresa pa asina dialoga mas tocante di e futuro di e desaroyo di e area aki pa asina por conserva nan herencia y asina duna nan aporte of sosten pa cu esaki.