Recientemente 3 representante di piscado tabata tin un reunion den parlamento pa trece e malcontento, disgusto y frustracion di tur e piscadonan di Aruba na e comision fiho di labor y sector primario.
Edward Dirksz, John Laurence y mi persona, a haci nos presentacion y oficialmente a haci entrega di un peticion pa coregi e Ordenansa di Proteccion di Naturalesa. Tabata tin hopi pregunta haci door di e parlamentarionan y nos a contesta tur pregunta cu maximo claridad.
E peticion di piscado ta pa cambia 2 articulo den ordenansa di proteccion di naturalesa cu ta prohibicion extremo cu ta afecta tur nos piscadonan di Aruba negativamente. E ley mester cambia for di uno cu ta discrimina y causa discriminacion contra piscado, perhudica piscado, y keda transforma den uno cu ta crea espacio pa e piscado por yuda maneha e recurso marino en cuestion. Esaki ta conforme tur tratado internacional cu ta pidi pa tambe tene cuenta cu e situacion local y e piscadonan local tradicional. E reunion tabata bon.
E proximo paso ta diamars proximo 26 di mei, ora nos ta reuni cu gerencia di Parke Nacional Arikok, pa papia cu e fundacion aki pa kita e “NO FISHING” riba varios borchi di nan y pa tene consideracion di piscadonan den formula e regulacionnan pa e areanan bou di nan control. Piscadonan uni no ta acepta mas cu ta tuma decision cu ta afecta piscado negativamente, sin consideracion algun di piscado, sin cu piscado tin representacion of envolvimento. E ta inhusto! E ta trece tambe cu sa tin hende ta keda ataca piscado cu menosprecio. Piscadonan uni kier cambia esaki. Piscadonan uni ta lucha pa un causa comun. Un discriminacion creciente contra piscado. Un danki na Shailiny Tromp Lee pa cumpli cu su palabra y a extende e invitacion asina lihe.
Union ta haci forsa! Man na obra!
