Algun dia pasa, nos redaccion a publica un articulo tocante e desaroyo cu ta tumando luga den area di centro di Oranjestad, den cual Fundacion Rancho a expresa cu dia pa dia comunidad por mira cu Aruba ta birando mas comercial y custumbernan ta keda atras. Un di esakinan ta e piscado.

Bon Dia Aruba tabata presente durante un reunion cu a tuma luga den area di Waf’i di Rancho, unda piscadonan a vocifera nan preocupacion tocante kico lo pasa cu nan den futuro. Esaki pa motibo cu den e sitio na e momentonan aki ta den construccion un hotel, cu segun nan mes a bisa, ‘no por haya parkeo pa para nos auto y baha e pisca cu nos ta trece tur dia’.

Donny Dania, representante di piscadonan di area di Rancho, a expresa cu e motibo pa cual nan a haci e reunion ta cu nan a tende cu e pier ta bay pasa pa Hadicurari. E preocupacion cu nan a expresa ta principalmente e hotel cu ta para di un banda. Riba e potretnan aki e lector por mira e desaroyo cu e hotel lo tin y nota cu e pier no lo existi mas.

Di mesun manera, Dania a bisa cu nan tin un par di luna cu e preguntanan, pasobra primeramente e luga ey tabata bou di Stichting Rancho: con ta bay para cu e pier, con ta bay para cu e facilidadnan manera pa parkeer; y nan no a haya ningun contesta.

Dania a señala cu e pier tin añanan di existencia y di un ‘manera inespera’ – segun e mes a expresa – nan lo bay perde e pier.

Dania a comenta cu loke nan kier haya ta informacion: con nan ta bay keda, con ta bay para cu nan pier. Tambe el a informa cu e mantencion di e pier mester bin, pa motibo cu nan no tin mantencion pa esaki. E piscadonan a yega di purba un manera pa nan mes traha riba dje, pero e materialnan ta hopi caro y Stichting Rancho no tin e facilidad pa por yuda nan cu esey.

“Nos ta purba manten’e, pero tambe nos ta haya cu den oranan di anochi y marduga tin hende cu ta subi riba e pier y ta daña e botonan.” Pa e motibo aki nan a pidi pa cera e luga y asina tene esaki priva pa tur e piscadonan.

Asina mes, Dania a comenta cu nan ta mira cu otro pier cu ta wordo construi tin tur facilidad di biaha, manera awa y coriente. En cambio nan no tin tur esey, den oranan di anochi e luga ta keda scur.

Pa loke ta trata e cultura di piscamento, el a sigura cu e miedo cerca tur piscado ta cu esaki lo bay perdi, pa motibo di e hotel den desaroyo. “Nan a pone un potret den e luga ey, masha bunita mes y e pier no ta riba e potret. Nos no kier haya un sorpresa cu nos tin cu bay pisca otro caminda pa via di e construccion aki”, Dania a finalisa.