E anuncio cu departamento di Naturalesa y Medio Ambiente (DNM) a haci recientemente tocante introduccion di un ley (Landsbesluit) cual ta contene un lista di especie di lama pa proteha y no mata, tin nos piscadonan local.

E decreto aki ta contene un lista cu entre otro piscanan cu ta wordo pisca pa consumo local, locual no a cay den bon tera cerca nos piscadonan. Pero no solo cerca nos piscadonan sino cerca e fundacion Centro di Pesca Hadicurari cu ta representa nan. Y hasta den gobierno mes, como cu departamento di Agricultura, Cria y Pesca (DLVV) ( Santa Rosa) ta indica cu nan no a wordo envolvi den e proceso aki.

Reunion
Presidente di Stichting Centro di Pesca Hadicurari (SCPH), Clifford Rosa a informa cu teniendo na cuenta cu e preocupacion di e piscadonan, nan a tuma contacto cu director di DNM, Gisbert Boekhoudt pa ricibi mas informacion di e supuesto ley aki. Nan a reuni dia 9 di augustus ultimo cu sr. Boekhoudt y Gino Wever kende ta hurista di DNM, unda nan a wordo informa riba un ley cu nan ta trahando riba dje pa prohibi e matamento di varios especie y protege nan, entre nan tin pisca of otro especie manera Djukfes, Yacupeper, Blue Tuna, Gutu y Kreeft.

Sr. Rosa a laga sa cu SCPH a dicidi di comparti nan preocupacion cu gobierno di Aruba, particularmente cu premier Mike Eman kende ta encarga tambe cu sector primario. Tambe cu e mandatario Mike de Meza kende ta minister di Medio Ambiente y minister di Husticia Arthur Dowers. E piscadonan concerni a pidi nan pa adresa e asunto di e ley aki cu e departamento di Naturalesa. Segun Hadicurari e gobernacion a indica cu nan mes no tabata na haltura pero cu nan tambe ta haya cu mester consulta prome cu e ley ta drenta na vigor. Aunke sr. Rosa a bisa cu no tin nada preto riba blanco pero si e compromiso di e mandatarionan pa wanta e aplicacion di e ley aki. Y e compromiso cu lo no implementa esaki sin consulta prome cu e piscadonan of nan representantenan.

Bon Dia Aruba no a verifica di banda di e gobernantenan ainda si realmente nan a haci e promesanan aki.

Sr.Rosa ta bisa tambe cu e ta lamenta cu no a tene cuenta cu e cambio cu a wordo introduci den e ley aki. No tabatin investigacion serio haci pa duna peso na e introduccion di e ley aki. Manera nan a haci un calco cu a bira scars y naturalmente a bin cu un proteccion, segun e.

Igualmente directora di Santa Rosa, Nathale Maduro a bisa cu e noticia aki ta hopi preocupante pa nan. Ya cu durante e ultimo 8 aña hopi inversion, alrededor di 1.5 miyon e ta calcula, a wordo haci den e sector primario pa drecha e facilidadnan pa e piscadonan rond di Aruba.