Algun siman atras Gobierno di Aruba a declara e “Toque de Queda y Shelter in Place”. Santa Rosa a informa Minister ariba e consequencia cu esaki lo tin pa esnan cu mester sigi practica nan ofishi pa nan por kome y bende cu famia. Esaki lo a hasie dificil pa Piscadonan por a subi lama.

Den cooperacion cu Ministerio di Sector Primario, KPA y Kustwacht, a opta pa implementa un maneho urgente pa mediante DLVV Santa Rosa, entrega na tur Cunukero, Criador y Piscado registra na Santa Rosa, un “Bevestiging” den forma di un carta, den cual ta identifca e persona y su crew como personanan registra y cu ta practica e diferente ofishi. Algun siman atras a tuma lugar, e siman di registacion pa Piscadonan. Aki ta unda cu tur Piscado a bin y registra na Santa Rosa caminda cu a ricibi nan carta despues cu nan a entrega e diferente papelnan nessecario. Mediante di e carta, ta regula e cantidad di persona ta cu maximo tres den un boto pa por bai pisca y si ta caso di Piscado di Baranca ta dos persona. Esaki tambe ta debi na e prohibicion di “Samenscholing” mas cu tres persona.

Riba peticion di varios Piscado cu no a logra registra, Minister Romero a opta pa habri e registro bek, pero den un forma digital, teniendo na cuenta e situacion cu e virus y safety di tur persona. For di diahuebs awor, 23 di april tin oportunidad pa hasi e registacion aki un biaha mas na tur esnan cu no a logra biaha pasa, pero den un forma digital. Pa esnan cu a manda nan documentonan caba via mail, nos kier hasi un apelacion pa manda esaki di nobo.

E mail pa registra ta registro@santarosa.aw y lo mester manda e siguiente informacion;

  • Nomber, adress y number di telefoon di e propietario di e boto si esaki ta diferente cu e Capitan.
  • Copia ID Valido di e Capitan y copia di su kleinvaarbewijs.
  • Copia di ID valido di dos tripulante adres
  • Si e dono di e boto no ta forma parti di e crew, mester un carta di e dono authorizando e Capitan y e crew pa hasi uso di su boto.
  • Registracion di Boto di Directie Scheepvaart y Copia di documento di e keuring di e boto.
  • No lubida cu e registracion aki ta conta solamente pa un (1) carta pa Boto.

Pa Piscado di baranca mester manda, basicamente mesun informacion, excluiendo registracion di boto. Pero ta importante pa indica den bo email, no mas cu tres localidad caminda e dos persona ariba e carta, lo bo bai pisca na baranca.

Nos ta hasi un apelacion na tur esnan cu no a registra ainda of ta desea di registra pa nan por haya e carta pa nan por bai pisca sin problema, pa nan manda nan peticion via registro@santarosa.aw pa asina nos por procesa bo registracion y pa tur Piscado por ricibi nan carta y pa por bay pisca sin problema. Tene cuenta cu mester manda tur informacion menciona ariba pa por ricibi boso carta. Si por tin cualkier pregunta, por tuma contacto cu Randy Maduro of Ludwig Rasmijn na 5858102.

Na momento cu e carta ta cla, nos lo manda un mail of jama pa informa e fecha y horario pa busca e carta na Santa Rosa na e booth di Security na entrada. Por ultimo nos kier informa, cu na momento cu KPA of Kustwacht confirma cu e nomber di e persona nan cu ta den e boto of piscando na baranca, no ta cuadra cu e nombernan ariba e carta of e grupo ta cometiendo un acto contra ley, e carta lo wordo confisca y e Piscadonan aki lo no tin opportunidad mas pa ricibi otro carta y bay pisca. Nos ta pidi e cooperacion di tur Piscador cu esaki.