Cada dia, e retonan di nos piscadonan ta mas grandi pa sigui mantene na bida e actividad tradicional aki: Leynan cu ta limita piscamento, gasolin, ekipo y instrumentonan caro. Nan ta parti di e lista cu tin riba impacto den e sector primario aki. Pero uno cu ta constituyendo un peliger latente ta cu e generacion jong di piscado ta masha poco mes.

Piscamento ta un tradicion y e ta parti di nos cultura cu nos tin cu protege. Pero – segun Biologo Marino, Byron Boekhoudt – den su combersacion cu e piscadonan, e ta sinti for di nan cu piscamento na Aruba ta den peliger di disparce.

Nan ta disparciendo keto bay y nan ta mira cu e generacion di piscadonan jong ta birando menos; of nan ta haya menos atractivo y disponibel pa bay den actividad di piscamento. Logicamente nan a studia bon y nan a bay bon scol y nan ta kies otro ramo. Tin un calculacion cu Aruba tin alrededor di 200 piscado so cu ta sali regularmente bay pisca. “Esaki ta un peliger pa henter di e ramo di piscamento”, el a bisa.

Esaki no solamente tin su impacto pa e parti cultural di Aruba, pero tambe nos tin cu corda riba e parti di alimentacion. Piscamento mundialmente ta conta pa un gran cantidad di proteina di consumo humano. Principalmente den e circunstancia cu ta biniendo, relaciona cu cambio climatico y un poblacion mundial creciendo. Esaki ta demanda pa pone mas atencion den e sector primario aki y inverti un poco mas aden.

E ta haya cu pa Aruba ta importante pa semper nos por mantene e sector primario aki, ya cu e ta un fuente di proteina pa consumo di nos poblacion. E no kier imagina si ta sosode algo desastroso cu ta limita nos posibilidad di importacion di producto alimenticio.

P’esey e ta considera cu ta conveni nos pais tin semper un poblacion di piscadonan artesanal. Hendenan responsabel cu ta cuida nos recurso y cu ta mantene e produccion di cuminda y e tradicion cultural aki.

Mas preocupacion
Pero e lista di preocupacion cu e piscadonan tin no ta cortico. Boekhoudt, kende semper a mantene un relacion estrecho cu e piscadonan artesanal, a declara na Bon Dia Aruba cu di un banda, e piscadonan ta sinti nan mes neglisha y menosprecia, y cu nan ta perdiendo tereno.

A expresa e sentimento aki den diferente forma. Un di nan ta cu nan luga di piscamento cada biaha ta wordo limita. Cada biaha ta bin cu mas ley cu ta restringi nan actividad. Leynan di prohibicion cu ta prohibi nan di haci nan trabou.

Boekhoudt a splica cu mas bon intencion cu e leynan aki por tin, y mas cu bo kier ta di acuerdo cu proteccion, pero si bo ta prohibi un piscado di pisca, ta mescos cu bo ta kita su pan.

Nan ta mira cu e tipo di restriccion y prohibicion den otro pais no ta asina. Tin regulacion y reglanan, pero cu mas participacion di e mesun piscado. E hecho aki ta duna miho resultado tanto pa e piscadonan como pa e instancia cu kier protege e recursonan marino. Esaki ta un punto cu e piscadonan local ta keha hopi di dje, e parti di participacion.

Otro ta relaciona cu e gastonan cu ta subi, entre nan gasolin, mantencion di boto y ekiponan of instrumento di piscamento. “Ta mescos cu den un joyeria bo ta cana ora bo ta bay cumpra ekipo di pisca,” el a bisa.

Generalmente material di pisca ta caro y nan ta e instrumentonan primordial di e piscadonan. Un di e cosnan cu Centro di Pesca Hadicurari ta purba di haci, mas tanto posibel cu cooperacion di e ministernan, ta semper preserva e facilidadnan y duna nan mas facilidad tambe pa nan por sigui haci nan ofishi.

Reciente a wordo celebra Dia di Piscado, y Centro di Pesca Hadicurari a organisa un actividad social y torneo di piscamento pa duna contenido honor na e trahadonan di e sector primario aki riba nan dia.