Dos pionero global di tecnologia moderno di edicion genetico a ser otorga ayera e prestigioso premio Israeli, Wolf Prize di medicina.
Wolf Foundation a bisa cu ta reconociendo Jennifer Doudna y Emmanuelle Charpentier pa nan trabou den desaroya e herment di edicion genetico CRISPR. Nan investigacion tin e potencial pa ‘revoluciona medicina door di habri caminda pa haya formanan nobo di tratamento pa malesanan actualmente incurabel’, segun e fundacion.
Edicion genetico ta un manera pa cambia DNA permanentemente pa ataca e causanan rais di un malesa basa riba genes. E por sirbi den un variedad amplio di otro uzonan tambe – for di ataca malaria den sangura te cu crea simianan mas resistente pa agricultura.
CRISPR ta un herment cu ta busca un piesa precies di DNA paden di celnan bibo y ta cort’e, permitiendo cientificonan pa ‘cende’ of ‘paga’ genes, repara of reemplasa nan. Ta uz’e den laboratorio pa hopi tempo y ta den estadonan inicial di test pa tratamento di cancer y otro malesa.
Tambe ta reconociendo Doudna pa su contribucion na discurso etico rond di uzo di e tecnologia aki, segun e fundacion.
Wolf Prize ta considera un di e precursornan di Nobel Prize. Alrededor di tres decena di laureado di Wolf a bay pa gana un premio Nobel. Cada aña, Wolf Foundation ta honra artista y cientificonan den cinco campo ‘pa logronan den interes di humanidad y relacionnan amistoso entre pueblonan’ cu e premio di $100mil. Su categorianan ta inclui agricultura, arkitectura, kimica, matematica, medicina, musica, pintura, fisica y escultura.
Otro ganadonan e aña aki ta inclui Yavoc Eliashberg y Simon Donaldson pa matematica; Pablo Jarillo-Herrero, Alan Macdonald y Rafi Bistritzer pa fisica; Cindy Sherman den arte y Caroline Dean den agricultura.
Anterior recipiente di e premio ta inclui Steven Hawking, Marc Chagall y Paul McCartney.
E ganadonan di e aña aki lo ricibi nan premio dia 11 di juni na Jerusalem.
