(AP)—Dos pionero di inteligencia artificial—Jhon Hopfield y Geoffrey Hinton—a gana e Nobel Prize den fisica ayera pasobra nan a yuda crea e “building blocks” di siñamento makineria cu ta revolucionando e manera cu nos ta traha y biba pero tambe crea menasanan nobo pa humanidad.
Hinton, ken ta conoci como e padrino di inteligencia artificial, a traha na University of Toronto, y Hopfield ta un Mericano trahando na Princeton. “E dos cabayeronan aki en berdad tabata e pioneronan,” segun miembro di e comite di fisica Nobel Mark Pearce.
E rednan neural artificial—nodonan di computer interconecta inspira pa neuronnan den e celebro humano—cu e investigadornan crea ta usa den e terenonan di ciencia y medicina y “tambe a bira parti di nos bida diario,” segun Ellen Moons di e comite Nobel na e Royal Swedish Academy of Sciences.
Hopfield, di ken su trabao a traha e fundeshi pa Hinton, a conta AP, “Mi ta sigui keda sorprendi pa e impact cu el a haci.” Hinton a pronostica cu IA lo tin un “influencia enorme” riba civilisacion, treciendo mehoracion den productividad y cuido medico.
Advertencia di e riesgonan di IA
E comite Nobel tambe a menciona preocupacion tocante e posible efectonan negativo di IA. Moons a bisa cu mientras e tin “benficionan enorme, su desaroyo rapido tambe ta trece cune preocupacion tocante nos futuro. Colectivamente, humanonan ta carga e responsabilidad di usa e tecnologia nobo aki den maneranan safe y etico pa e beneficio di ser humano.”
Hinton, ken a retira for di un rol na Google pa e por papia mas liber tocante peligronan di e tecnologia cu el a yuda crea, ta comparti e mesun preocupacionnan ey. “Mi ta preocupa cu e consecuencia di esaki por ta sistemanan mas inteligente cu nos cu eventualmente lo tuma over control,” Hinton a bisa.
PA su parti, Hopfield, ken a firma peticionnan pa investigadornan den pasado haciendo yamado pa control fuerte riba e tecnologia, a compara e riesgo- y beneficionan na virus y energia nuclear, capaz di yuda y trece daño na sociedad. Na un conferencia di prensa na Princeton, el a haci referencia na e preocupacionnan, notando e imagen distopico den e buki “1948” di George Orwell, of e apocalipsis crea pa e fisico den Kurt Vonnegut su “Cat’s Cradle.”
