Arnold Spielberg, tata di cineasta Steven Spielberg y un ingeniero innovativo, kende su trabou a yuda haci computer personal posibel, a fayece cu 103 aña di edad.

Spielberg a fayece di causa natural rondona pa su famia na Los Angeles diamars, segun un declaracion di su cuatro yiu,

Spielberg y Charles Propster a diseña e computer GE-225 na fin di añanan 1950 mientras tabata traha pa General Electric. E mashin a permiti cientificonan di computer na Dartmouth College desaroya e lenguahe di programacion BASIC, cu lo ta esencial pa e ascenso di computer personal den añanan 1970 y 1980.

Arnold a yuda Steven produci su prome pelicula completo, ‘Firelight’, traha na 1963 na momento cu e director tabatin apenas 16 aña.

Yiu di inmigrante Hudiu Ucraniano, Arnold Spielberg a nace na Cincinnati na 1917. E tabata obsesiona cu aparatonan electrico di cuminsamento, construyendo su propio radio crystal cu 9 aña di edad y un ham radio cu 15 aña, desaroyando habilidadnan cu e lo usa durante Segundo Guera Mundial como operador di radio y chief communications pa e Scuadron di Bom 490, tambe conoci como e ‘Burma Bridge Busters’.

Su experiencianan durante e guera tabata parti di e inspiracion pa e pelicula di su yiu na 1998, ‘Saving Private Ryan’.

Arnold Spielberg a gradua di Universidad di Cincinnati y a bay traha den investigacion di computer pa RCA, unda el a yuda desaroya e prome cash-register computarisa POS, prome cu bay na GE.

Despues el a bay traha riba e tecnologia di archivo usa pa e USC Shoah Foundation, un organisacion funda pa su yiu pa preserva historianan personal di holocaust.

Steven Spielberg di 73 aña tabata e prome yiu di Arnold. E tambe tabatin tres yiu muhe: guionista Anne Spielberg, productor Nancy Spielberg, y ehecutivo di marketing Sue Spielberg.

Tur cuatro tabata yiu di su prome esposa, Leah Spielberg Adler, kende a fayece na 107. E dos a divorcia na 1965, y e problemanan cu e divorcio a trece pa Steven a ser explora den su pelicula di 1982, ‘E.T.’

Tercer esposa di Arnold Spielger, Bernice Colner Spielberg, a fayece na 2016.