Diadomingo marduga a fayece, Sr. Enrique Trimon, director gerente di National y Alamo Car Rental. Enrique tabatin 91 aña y el a fayece na cas producto di cancer, pa cual motibo e tabata interna na Dr. Horacio E. Oduber Hospital. Prome cu e tabata interna na hospital na Aruba, e tabata ricibi tratamento medico pa su condicion na Costa Rica.
Conoci y respeta den e sector empresarial, Trimon Sr. tabatin 50 aña den e negoshi di huur auto como doño y director gerente. E tabata un di e pioneronan di e negoshi di huur auto na Aruba. Su compania di huur auto ta entre e poco nan cu a keda den famia pa decadanan te awe. Un stabilidad poco comun awendia den e sector aki cu a contribui grandemente cu nos industria turistico. Decadanan atras e tabata entre e empleadonan mas grandi na Aruba.
Enrique a nace na Aruba riba 11 di juli 1925 y tabata casa cu Victoria Scharbaay (d.f.m). El a funda National Car Rental-Aruba na aña 1978. Prome cu esey, Enrique tabata opera Enrique Car Rental.
National y Alamo ta entre e marcanan di mas conoci mundialmente, cu shete alocacion na Aruba. Pa seis decada el a biaha regularmente pa Costa Rica, su segundo cas. Su prome trabou tabata como loopjongen na Aruba Trading.
Pero sr. Enrique Trimon tabata uno di nos militarnan veterano durante II Guera Mundial, y un di e poco cu ainda tabata na bida na Aruba. Como militar na Aruba, e tabata encarga pa cuida e tankinan di Lago. El a yega di ricibi Condecoracion Real.
Sr. Enrique Trimon ta laga atras un gran famia, entre nan, nan yiunan: Rafaela (Haydee di e negoshi “Himalaya”) Trimon, Enrique (Erick) Trimon Jr. y Johanna Trimon. Nan nietonan: Orchard Gomez, Enrique (Eurick) Trimon III, Orchaira Gomez, Bryan Trimon.
Cu sr. Enrique Trimon, sosega na paz y forsa na e famia.
