Fundacion Rancho hunto cu Feria Social y CEDE Aruba kier bin cu algun borchi den e bario di Rancho pa identifica e diferente hanchi cu balor cultural cu e bario aki tin.
Trahado social di e fundacion Rancho, Ginelly Quandt a bisa cu nan kier bin cu e borchinan aki en conexion cu nan proyecto “Adopta un Hanchi”, pasobra actualmente no tin niun borchi na Rancho. “Niun hende sa na unda nan ta bay. Nan sa di Rancho pero nan mester sa kico ta e hanchinan y na unda nan ta localisa”, el a bisa.
P’esey nan kier bin cu e borchinan pa asina turistanan y local cu kier bishita e bario aki por haya sa un poco mas riba historia di e hanchinan. Nan tin e borchinan caba pero nan kier pinta nan di un forma artistico.
E ta haci un peticion na esunnan interesa pa bin yuda nan den e proyecto aki. E no necesariamente mester ta artistanan conoci sino tur hende cu ta desea di traha boluntariamente ya cu nan tin suficiente borchi pa pinta.
El a bisa cu si bo ta interesa pa haci un cos creativo nan ta warda bo awe dia 2 augustus for di 8or te ora di merdia nan ta na fundacion Rancho pa bin yuda nan den e pintamento artistico di e borchinan cu ta bay identifica cada hanchinan den Rancho.
