Presidente di Chile, Sebastian Piñera, a decreta estado di catastrofe pa e districtonan nort di e pais afecta pa inundacion di riunan, cu a laga por lo menos un morto y dos persona desaparecido desde dialuna ultimo.
“Mi kier anuncia cu nos lo decreta estado di catastrofe den e comuna aki, pa por dispone di tur e recurso y facilidad pa yuda e hende damnifica y protege e bidanan y propiedad di e personanan di e region aki”, e mandatario a bisa na su yegada den helicopter na region di Atacama.
E presidente Chileno a yega na ciudad di Alto del Carmen, un di e mas afecta pa inundacion di e riu Huasco, cu den su paso pa e localidad di El Transito a causa e perdida di un bida y e desaparicion di otro dos persona.
Awa di e yobidanan cu cada aña, den temporada aki, ta recore centenares di kilometer di Bolivia y cordillera di Los Andres via Chile, ta causa inundacionnan principalmente na luganan memey di desierto di Atacama.
Oficina Nacional di Emergencia (Onemi) di Chile a informa e jornada aki cu ta permanece e situacion di alerta geel pa e comunda di Copiapo, Tierra Amarilla, Diego Almagro, Chañaral y Alto del Carmen den e region ey.
“Nos ta bay dispone tur medida pa yuda victima y hende damnifica, pero tambe pa preveni, pasobra ta posibel cu awa lo sigui cay y nos kier tuma medida special”, Piñera a adverti y tambe a splica cu e lo tuma parti di un reunion cu autoridadnan pa conoce e situacion exacto.
