Seguro nacional AZV ta informa cu nan ta sigui regla charter pa nan pashentnan cu mester bay Colombia pa tratamento. Esaki como cu e pilotonan di Avianca ainda ta den welga.
Asina mayoria di vuelonan pa Bogota y Cali ta cancela.
“Ta asina si cu tur dia ta evalua tur e casonan cu tabata pendiente y ta duna prioridad na esnan mas urgente. Incluso AZV a haya su mes obliga di manda algun pashent sin acompañante social. Meta primordial ta pa e pashent haya su cuido medico y despues lo wak con ta haya vuelo pa manda e acompañante social”, asina e compania di seguro ta laga sa.
AZV ta sigui nan declaracion cu: “ Tur dia ta tene contacto directo cu Avianca pa asina evalua cuanto cliente di AZV (pashent) ta sali rumbo pa Bogota, Colombia. Na mes momento ta percura tambe pa algun cu ta cla, regresa Aruba. E situacion na Cali tambe ta dificil ya cu no tin suficiente vuelonan disponibel. Actualmente AZV ta treciendo pashentnan bek pero no ta tur por regresa pareu. Ta pidi encarecidamente na tur cliente e pasenshi pero ta sigura cu ta sigui busca un solucion mas concreto.”
