E politico Colombiano, Pilar Cordoba, kende recientemente a bishita Aruba pa participa den un congreso tocante cannabis, a denuncia cu a bira riba victima di un agresion den un restaurant local.
E noticia aki, cu ta birando un mal propaganda pa Aruba, a cuminsa circula den diferente medio social, despues cu e ex- congresista aki a denuncia via Twitter cu un hende a intenta ataca su persona cu un pida di boteya kibra.
El a pone den su Twitter cu ‘un hende a intenta ataca mi cu un boteya kibra. Si no tabata pa mi yiu, cu a reacciona lihe, ken sa loke por a sosode. E hendenan aki ta wordo busca pa polis di Aruba’, el a bisa. Tambe el a haci un yamada pa e hendenan bira mas tolerante y tin mas respet. Tambe pa mantene dialogo, pa asina traha hunto riba loke ta uni nan y no riba loke ta separa nan.
Un medio Colombiano cu a traha riba e noticia aki ta Publimetro. E articulo cu nan a divulga ta mustra cu e politico di ideologia comunista a bin di vakantie na Aruba, hunto cu un yiu di dje cu ta senador na Colombia. Nan a bishita un restaurant local y mientras cu nan tabata come, algun hendenan a cuminsa tira palabra riba dje, debi na su relacion cu ex presidente fayecido, Hugo Chavez di Venezuela. E hendenan a bis’e cu e no mester t’ey den un restaurant di nivel.
Cordoba, kende a wordo invita pa un organisacion local encarga cu e realisacion di e conferencia riba uzo di cannabis medicinal cu sosten di partido RED, a laga sa cu danki na su yiu homber, e agresion no a escala. Pasobra tur cos a complica inicialmente, y e mes no sa con e cos aki por a caba.
E bishita di e politico Pilar Cordoba a produci hopi reaccion na Aruba. Te hasta a wordo critica dicon e gobierno di coalicion (MEP-POR-RED) a invit’e pa bin Aruba pa papia riba legalisacion di cannabis. Te hasta durante e tratamento di presupuesto 2019, fraccion di oposicion (AVP) a critica cu a uza fondo di gobierno, y muy particularmente di enseñansa, pa patrocina e conferencia aki.
Di su banda, prome minister di Aruba, Evelyn Wever-Croes a yega di declara cu e mes no tabata na altura, ni tampoco a wordo informa, tocante e presencia di Pilar Cordoba na Aruba. Igualmente, el a laga sa cu su gobierno no tabatin nada di haber cu e congreso tocante cannabis realisa recientemente na Renaissance Conference Center.
