Un desaroyo nobo ta tumando luga cerca e pier di e piscadonan di Rancho cu ta bou e maneho di Stichting Rancho. Trabou ta tumando luga den edificio Mar Azul y e master plan di Aruba Ports Authority (APA) a wordo presenta pa desaroyo nobo riba e tereno di waf na Oranjestad

Presidente di e fundacion aki, Clifford Rosa a bisa cu e pier aki a haya e nomber di Waf di Rancho. Nan a bin cu e decision di batisa e pier cu e nomber nobo aki, mirando cu como fundacion nan ta fomenta pa añanan e desaroyo di pesca y di e piscadonan di Rancho. Pero tambe desaroyo di e area cu ta yama schonerhaven y e mercado of markthallen. Nan ta na expectativa di tur loke a wordo anuncia encuanto desaroyo y embeyecemento di e area aki.

Recientemente Stichting Rancho a wordo acerca pa APA pa sa cual ta e intencion di e fundacion. Segun sr. Rosa, Stichting Rancho tin añanan mustrando gobierno kico ta nan intencion, ya cu den nan statutonan tabatin e maneho di schonerhaven y e maneho di markthallen.

“E ta algo cu sigur como fundacion nos ta desea pa mira wordo concretisa un dia por escrito”, el a bisa.

Nan intencion ta pa e fundacion por haya acceso pa por maneha tanto e schonerhaven y e markthallen, mirando cu esaki por garantisa un desaroyo economico pa Rancho. Nan ta mira cu esaki lo ta e motor cu lo por yuda e fundacion sigui biba y sigui duna locual nos ta sigui haciendo pa conserva un parti di e historia y cultura di Rancho, segun sr. Rosa ta splica.

E ta argumenta cu ta importante pa garantisa e desaroyo economico pa Rancho pasobra nan ta mira cu e parti social a wordo laga un banda. Tambe e desaroyo economico den e area a wordo maneha pa diferente gobierno y tambe pa diferente comerciantenan priva. Pues el a indica cu e lama aki y e waf aki ta sumamente importante pa e habitantenan di Rancho.

Desaroyo tereno di waf Oranjestad
Segun e master plan di APA pa desaroyo nobo riba e tereno di waf na Oranjestad, un 50% di un area di 20 hectar lo ta propiedad inmobiliario cu diferente uzo. APA lo stipula e guidelines cu nan mester sigui entre otro grandura y estilo.

Tambe pa desaroya y embeyece full e area ey, APA a acerca esunnan encarga cu proyecto di Bushiri Beach y cu e propietario nobo di Mar Azul pa asina yega na un cooperacion cu lo maximalisa e atractivo di e waf di Oranjestad pa e industria crucero.

Segun sr. Rosa como Stichting Rancho cu ta frecuenta e pier aki por a observa cierto desaroyonan. Tambe nan a mira cierto hendenan cu ta bin midi. Te hasta el a compronde cu tin hendenan cu a subi e pier aki, pero el a wordo baha fei di e pier “mirando e intencion cu no ta corecto”.

Sr. Rosa a declara na Bon Dia Aruba cu como fundacion nan no tabatin e fondonan pa por haci e proyecto aki di e pier nobo. P’esey nan a presenta e proyecto di e pier aki na Fundacion Centro di Pesca Hadicurari. Despues di basta tempo nan a acepta pa inverti den e renobacion di e pier aki situa cerca di Mar Azul, y e trabou a wordo finalisa debidamente.

“Sigur pa nos ta un orguyo pa tin algo bunita asina aki. Sigur e piscadonan di Rancho ta sumamente contento”, el a bisa.