Tin varios rumor cu ta andando rond cu no ta berdad como tambe un tiki misterio cu hopi pregunta habri ainda relaciona cu e caso di e bestianan exotico cu a wordo haya diadomingo ultimo.
Tin algun rumornan bayendo rond segun Veterinaire Dienst Aruba cu no ta berdad, entre otro cu nan lo ta buscando hende pa bin busca e bestianan y e cantidad di bestianan cu a fayece cual nada no ta confirma. Segun sr. Phillip Conrad Merryweather di Phillip’s Animal Garden ta confirma na Bon Dia Aruba, e rumornan cu ta circulando rond cu ta el a manda busca e bestianan aki tampoco no ta berdad. Sr. Merryweather ta bisa Bon Dia Aruba cu e sa si ken ta e persona cu a purba trece e bestianan aki mirando cu e persona a tuma contacto cu Merryweather pa algun tipo di asistencia, pero no por a divulga ningun otro informacion. Merryweather ta comparti cu Bon Dia Aruba cu e tin mayoria di e bestianan aki anto no tin necesidad di busca mas. Sr. Merryweather ta wardando Ministerio Publico haci su trabao anto warda riba instancianan concerni pa e cuminsa yuda den locual cu e por. Segun Merryweather, e bestianan tin dos dia caba cu nan a wordo haya anto e ta bisa cu ta diamars nan a cuminsa haya cuminda locual e no ta haya bon.
Boet di 5.000 florin pa cabes
Segun Ministerio Publico, nan a confirma cu nan no ta bay pone e bestianan drumi anto e bestianan a wordo haya riba un yate cu tres persona kende no a wordo deteni. Asina cu e proces verbaal keda cla, boet cu lo core den ramo di 5.000 florin of un luna di detencion lo cay pa esnan culpabel, locual segun OM esaki ta e maximo castigo. E proces verbaal tin cu mustra kico precies tin y e ora fiscal ta pone tur cos hunto y ta yega na un total. Vocero di OM, sra. Ann Angela ta bisa: ”Tabata tin mas cos cu nan a haci contra ley. Awor ta mucho lihe pa bisa cu exactitud kico e castigo ta bay bira. Pero e ta bay den e careda ey.” Segun Veterinaire Dienst Aruba, pronto ta bay tin un rueda di prensa riba e asunto aki pa asina por ofrece mas informacion na kico exactamente ta bay pasa cu e bestianan aki. Riba rednan social sin embargo, varios hende keto bay ta comenta cu nan ta preocupa cu e situacion aki y ta pidi pa accion prome cu tur e bestianan aki mester muri.
Veterinaire Dienst tabata bezig ta atende dos parha na momento cu Bon Dia Aruba a pasa un rato en buskeda di informacion. Un di e parhanan aki tabata mustra hopi malo y Veterinaire Dienst no por a divulga ningun informacion na e momento en cuanto ta e situacion di e otro bestianan. E bestianan ta actualmente na e Abattoir na Barcadera unda cu ta mata bestia y ainda no ta confirma si dokternan a check nan pa cualkier enfermedad.
