Miembro di partido United Democrats (UD), Sarah Wescot-Williams, a entrega su carta di retiro como Presidente di Parlamento ayera diadomingo.
Wescot-Williams a bisa den su carta na parlamento ayera anochi cu “sabiendo e ultimo desaroyonan politico, mi ta entrega por escrito mi retiro como Presidente di Parlamento, dunando un danki na e miembronan di parlamento pa nan cooperacion durante mi temporada”.
E presidente ta retira na un momento ora e gobierno entre UD y St. Maarten Christian Party (SMCP) a perde sosten di dos miembronan di parlamento, Luc Mercelina y Chanel Brownbill, kendenan a sali di nan partidonan respectivo pa forma un coalicion nobo pa forma un gobierno cu partidonan di oposicion.
Miembro di parlamento Franklin Meyers (UD), kende recien a declara su mes como independiente, aparentemente no ta bay participa den e combersacionnan pa forma un coalicion nobo. No por a confirma e rumornan cu ta circulando unda ta bisa cu conseho di ministernan lo bay disolve parlamento mirando e desaroyonan nobo.
E presidente cu ta tumando su retiro, Wescot-Williams, a confirma na The Daily Herald cu un coalicion nobo ta formando. Segun The Daily Herald, e coalicion lo ta entre National Alliance (NA) y United St. Maarten Party (US Party).
