Despues cu Luc Marcelina y Chanel Brownbill a dicidi di sali di e coalicion entre UD y SMCP pa bay forma un coalicion nobo cu en total 9 miembro entre National Alliance y United St. Maarten Party , Conseho di Minister a dicidi di disolve parlamento. Asina yamando e di 9 eleccion pa 9 aña consecutivo na St. Maarten.

Prome minister a anuncia e decision aki durante un conferencia di prensa, alabes haciendo cierto acusacionnan contra e coalicion, parlamentarionan den oposicion, pero tambe contra cierto ministernan den Conseho di Minister. El a referi na declaracionnan haci un siman pasa unda a yega un ‘impasse’ politico, pendiente pa Gobernador Eugene Holiday yega bek pa asina aclaria e situacion.

E prome minister di e pais di Reino cu awo tin 9 parlamento den 9 aña desde cu a bira independiente a bisa cu un ‘cultura di miedo’ a reina den e ex coalicion y cu esaki a crea un ambiente di trabou ‘toxico’. “E pais a bira ingobernabel, cu hopi di e miembronan individual den coalicion di Parlamento pensando cu nan por dicta kico Conseho di Minister of un minister individual mester haci, asina faltando respet na nos constitucion”, e prome minister a bisa.

“Trias Politica tabata den peliger. Nos ta consciente cu tin hende cu influencia pafo di Parlamento purbando pa maneha e pais aki desde afo, mientras ta sinta trankil sin por tin algun responsabilisacion pa nan. Desafortunadamente nos mester a conclui y manera e populacion por mira, nan a gana”.

Prome Minister Leona Romeo-Marlin a bisa cu nan tabata consciente cu tabatin miembronan di coalicion cu secretamente y tambe abiertamente tabata bay na banda di oposicion. Pero e ta enfatisa cu Conseho di Minister su mandato di e mesun coalicion aki, tabata pa coopera cu World Bank y Hulanda pa haya e fondonan necesario pa reconstrui e isla. “E coalicion nunca a bin cu alternativa pa no mester traha cu ambos instancia ni a bisa cu den futuro no lo kier traha cu algun di nan. Pa e rason aki nos a sigui haci nos trabou y nos a deliver cu mas cu 125 miyon dollar di e 580 miyon cual nos a priminti”.

E prome minister na mesun momento a entrega su retiro di politica y a expresa cu e no ta bay participa den e eleccion nobo. “E periodo aki tabata yen di retonan cu a pisa duro riba mi bida personal, salud y famia. Mi a resisti abuso extensivo, fake news, sabotahe, menasa y decepcion”.