E cambio di biento constante combina cu e coriente di e awa cu ta cambia di robez pa drechi y viseversa a bira un obstaculo pa loke ta e prestacion di e atletanan den e disciplina di Laser Radial esaki na e Weganan Olimpico di Rio 2016.
E Weganan Olimpico 2016 a continua diamars merdia ora cu e atleta Philipine van Aanholt a drenta su di dos dia di competencia. Despues di a finalisa e prome dia na di 26 luga den overall standing, Philipine kier a haci su maximo esfuerso pa subi di posicion. Mester bisa cu despues di un retraso cortico den e competencia, Philipine a inicia na su di tres heat mirando cu dialuna ya caba e la nabega e prome dosnan. E di tres heat a bay den bon forma pa e atleta Philipine van Aanholt unda e ta logra finalisa esaki na posicion number 18, e miho den e Weganan Olimpico aki te cu awor. Asina mes Philipine tabata miho para y un desicion a coste algun puesto den e careda aki. Pa finalisa e dia, Philipine van Aanholt mester a nabega e heat number 4 cual heat e la encontra varios problema.
“E biento den e Marina Da Gloria na Rio de Janeiro tabata fuerte y ta bira constant, riba dje e coriente di awa tabata dificil pa lesa, casi tur participante tabata tin e dificultad ey den heat number 4”, Van Aanholt ta conta.
Remarcabel ta cu tur e bon atletanan di vela a encontra varios problema cu e heat aki consecuentemente casi tur a cay un of mas posicion riba e tabla general. Nos atleta Philipine van Aanholt a finalisa e heat number cuater na posicion number 32 y ta cay asina di puesto 26 pa 27 riba e tabla di posision nobo. No obstante di esaki, Philipine tin 3 dia di competencia mas pa bay y ta sinti cu e por mucho mas miho y ta spera cu e condicion di tempo mehora.
