Tin demasiado victima di trafico den e parti Caribense di Reino. Pa motibo di esey lo keda actua cu man duro y castiga cu boet di biaha pa cambia e comportacion di esunnan tras di stuur.
Esaki procurador-general (PG) Roger Bos di Ministerio Publico (OM) di Corsou, St. Maarten, Boneiro, Statia y Saba ta elabora den su discurso diamars riba entre otro e prioridadnan pa 2018.
Ultimo aña a parti tres biaha mas boet na Corsou, e ta enfatisa, compara cu e añanan anterior. “Y si bo no ta paga, esaki tin su consecuencianan: bo no ta sali via Hato of nan ta para bo durante control y bo mester scoge si bo ta paga di biaha of entrega bo auto.” E ta bisa cu nan ta prefera cu automobilistanan por paga boet di biaha (swipe) ora polis ta gara nan. “Pasobra e ta necesario pa cambia e comportacion den trafico. Tin demasiado victima na St. Maarten, Boneiro y Corsou.”
E PG ta bisa tambe cu: “Nos mes tine den nos man. Pero no si nos ta na telefon coriendo mucho duro y pasa luz cora; sin bisti faha y laga muchanan chikito sinta den nos scochi tras di stuur. Nos como OM kier cu polis ta actua duro contra esaki. E cobramento di boet ta bayendo bon y esey ta beneficia e pais. E prome mal pagado ya ta sinti su castigo y su boet mientrastanto no ta baha. Sinembargo nos ta prefera na final niun boet pero e ora menos victima. Boetnan no ta bala pena compara cu e dolor personal y gastonan pa comunidad di tur daño y admision na hospital.”
Corupcion
Un otro prioridad ta combatimento di corupcion. “Hende ta merece miho y OM kier contribui pa actua duro contra corupcion den e top”, segun PG Bos. E ta bisa cu ‘minoria riba posicionnan crucial ta tuma mucho di pueblo y sconde placa, no paga belasting of haci fraude cu facturanan sin prestacion’. “Nos meta como Ministerio Publico ta pa recobra e placa y por medio di e fondonan di criminalidad inverti den siguridad di pueblo. Pues placa di criminal lo bira cambia den placa pa combati criminal.”
Medio ambiente: team special
Un otro prioridad ta colaboracion y tambe riba tereno di medio ambiente, e PG ta informa. Minister di Corsou encarga cu Medio Ambiente, esta Suzanne Camelia- Römer, lo lansa awe un team special yama X-team cu activamente lo investiga casonan na Corsou. Sr. Bos ta bisa cu esaki no ta un tarea principal di OM pero e ta mira si cu nan mester hunga un rol mas cla den e proceso di duna boet y cobramento. “Mester caba cu e dumpnan ilegal cu ta sushando nos medio ambiente y asina bira menos atractivo como destinacion di vakantie. Na Boneiro y St. Maarten esaki medio ambiente tambe ta un topico importante. Na St. Maarten salud publico ta sufriendo como cu e dump ta causando hopi molester y e huma probablemente ta toxico. Tur, tambe e ministernan ta realisa cu mester haci algo.”
