(NLTimes) – Compania farmaceutico Mericano, Pfizer ta usando un compania letterbox na Capelle aan de Ijssel na Zuid Holland pa dirigi 36 biyon dollar den ingreso anual como un metodo pa evita paga impuesto corporativo riba su ganashi, segun plataforma di periodismo investigativo, Follow the Money.

Maske e compania ta desaroya medicina y vacuna cu fondonan publico y donacion pa investigacion, e compania ta paga masha tiki impuesto, y casi nada di impuesto na Hulanda, segun e reporte.

Cantidad di actividad di Pfizer pafo di Merca ta maneha riba papel pa e compania letterbox yama CP Pharmaceuticals International CV (CPPI). CPPI tin mas di 350 holding mundialmente, incluyendo decenas den e tax havens di Irlanda y Luxembourg. Den e prome tres luna di e aña aki, ingreso di e compania a aumenta cu 42 porciento.

For di e oficina di 220 persona, CPPI a genera mas di 139 biyon den ganashi durante ultimo decada. Su turnover anual a keda calcula na mas di 36 biyon, segun Follow the Money. Pfizer ta emplea mas di 80 mil persona mundialmente.

Investigacion publica aña pasa a mustra cu politica Hulandes a permiti negoshinan multinacional evita legalmente di paga 22 biyon euro den impuesto anual. E aña aki, Hulanda a keda na di cuatro luga riba un lista di e tax havens mas grandi di mundo, segun Tax Justice Network. Multinacionalnan hopi biaha ta pasa ganashi di subsidiarionan a traves di companianan Hulandes, preveniendo cobransa di impuesto riba ganashi genera na otro pais. Hopi biaha no ta paga impuesto riba e placa aki na Hulanda tampoco.

E cifranan global di e compania pa fin di aña reporta na februari a mustra cu a genera 41.9 biyon dollar na 2020, generando 9.6 biyon dollar di ganashi. A declara cu a paga un tasa di impuesto efectivo di 6.4 porciento. Esey tabata un aumento riba e 5.4 porciento paga na 2019 riba 16.3 biyon den ganashi cu turnover di 41.2 biyon dollar.

De hecho, Marc Kaptein, director medico di Pfizer Hulanda, a bisa cu ta spera cu benta di su vacuna di Covid-19 lo suma 21 biyon dollar. El a skirbi den un columna den Volkskrant cu “ta spera ganashi lo ta ‘un porcentahe di ingreso, halto den su 20nan’. Esey ta hopi placa. Pero no lubida cu a aumenta produccion den tempo record, pa asina nos por entrega mas dosis na Europa rapidamente.”

“Nos ta haci negoshi den mas di 150 pais rond mundo. Na tur momento, y unda cu nos ta opera, Pfizer ta cumpli cu tur ley di accounting y impuesto. Nos ta paga tur impuesto cu nos debe”, e representante di e compania a bisa den un respuesta.

“Cantidad di placa a bay den industria farmaceutico, y esey awo lo ta hopi mas. E companianan aki ta solamente bay bira mas poderoso”, segun Vincent Kiezebrink di grupo independiente di investigacion, Research Foundation for Multinational Enterprises (SOMO).

Companianan manera Google y fabricantenan grandi di tabaco, y hasta productor di test di coronavirus, Qiagen, tur a keda critica pa usa leynan di impuesto Hulandes pa nan beneficio global. Mei ultimo, e gabinete a revela un politica pa combati e problema cu un retencion di impuesto nobo cu por drenta na vigor na 2024.

Na 2018, un estudio di Oxfam Novib a identifica 135 subsidiario di e cuatro compania farmaceutico na Hulanda so.