Dialuna 2 di maart, Guyana lo celebra eleccion general cu expectativanan grandi riba su futuro. E di dos pais mas pober di Sur America lo por bira un potencia petrolero danki na e deposito di petroleo di mas di 8.000 miyon bari descubri na 2015.
Luna di december ultimo a cuminsa e extraccion di petroleo. E produccion medio na e momento ta di 120.000 bari pa dia, pero lo por alcansa 750.000 bari pa dia na 2025, kiermen, un bari pa cada Guyanes.
Na januari, tres barco a inaugura e ciclo di exportacion cu e envio di un miyon di bari pa Merca. Awor e pregunta grandi ta con ta bay inverti e petrodolarnan. E politiconan den campaña ta priminti destina e placa pa desaroyo di infrastructura, educacion y sanidad.
“Den cierto sentido, e petroleo ta e salbacion pasobra lo permiti nos haya e placa cu nos falta sin cu mester pidi prestamo. E idea ta us’e pa restructura industria, expande, diversifica y duna mas balor na economia’, minister di Finanzas, Winston Jordan a señala y a mustra preocupa pa via di e crisis cu algun sector strategico di economia Guyanes ta sufri den e mercado internacional,como bauxiet, aros y sucu.
Sinembargo, un parti di e poblacion no ta confia cu e ingresonan halto di petroleo lo bay pa mehora e nivel di bida di e Guyanes. “Mi ta spera cu tur hende di e pais aki lo haya un parti chikito, pasobra nos tin hopi otro recursonan natural cu ta exporta y di cual nos no ta haya nada, manera e caso di oro. E politiconan ta bisa cu nan a inverti den infrastructura, pero esey no ta berdad”, un bendedo cayehero na Georgetown, capital di Guyana ta bisa.
E organisacion Transparency Guyana ta impulsando un audiencia publico pa e Guyanesnan por indica di forma democratico y participativo den kico nan ta prefera inverti e regalia di petroleo. Na final di proceso, Transparency Guyana ta pretende presenta e resultado di e encuesta aki pa e coalicion cu lo asumi Gobierno den proximo eleccionnan.
