(EFE) – Presidente di Colombia, Gustavo Petro, a pronostica ayera diamars den su discurso dilanti Asamblea General di Nacionnan Uni, cu “e fin” di Humanidad a cuminsa debi na e “genocidio” na Gaza, gueranan y cambio di clima cu a causa diesun miyon hectar di selva di Amazona kima den solamente un luna debi na kentamento global.
Den su di tres discurso dilanti ONU, Petro a denuncia cu paisnan poderoso, cu tin e “poder pa destrui e bida di humanidad” en bes di stop e bombardeo na Gaza, no ta scucha e mayoria di otro hefenan di Estado cu ta pidi pa stop e “genocidio.”
“Nan no ta scucha nos ora nos vota pa stop e genocidio na Gaza, aunke nos ta e mayoria di e presidentenan di mundo y representantenan di e mayoria di humanidad; un minoria di presidentenan cu por stop e bombardeo no ta scucha nos, es decir, nan no ta scucha nos e presidentenan di e paisnan cu por destrui humanidad”, e prome mandatario izquierdista di Colombia a lamenta.
E mandatario a recorda cu un aña pasa el a pidi e resto di e paisnan pa un conferencia di paz pa Palestina, ora cu e ofensiva Israeli na Gaza no a cuminsa despues di e atakenan di dia 7 di october, y awe “nos tin 20.000 mucha homber y mucha muhe asesina bou di e bomnan y e presidentenan di e paisnan di destruccion humano ta hari den e coredonan aki”.
Aunke e mayoria di paisnan a boga pa un fin na e guera, “e poder di un pais na mundo no ta ser eherci mas door di e tipo di sistema economico of politico, of e ideanan cu e ta emiti, sino door di e poder di destrui e bida di humanidad”, el a agrega.
Di e manera aki, e mandatario a sigura cu “e control di humanidad a base di barbaridad ta den construccion y su demostracion ta Gaza. Ora Gaza muri, humanidad lo muri.”
Di e mesun manera, e crisis di clima ta hibando na fin di humanidad, segun Petro, pa motibo cu “cientificonan a bisa cu si e selva di Amazonas kima nos lo yega na e punto di no regreso climatico, caminda e decisionnan humano pa stop e collapse lo ta inofensivo caba y e selva di Amazonas ta kimando”, el a corda, mencionando na e centenares di candela cu a tuma luga den e ultimo simannan na Sur America.
E mandatario tambe a referi na desigualdad social, recordando cu Oxfam a indica e siman aki cu e 1% mas rico di humanidad tin mas rikesa cu 95% di henter humanidad combina.
Mescos cu añanan anterior, Petro a ataca e mercado liber, señalando e biaha aki cu ta “e maximizacion di morto” y enfatisando cu e 1% mas rico ta esun cu ta permitiendo “bomnan ser tira riba e hendenan muhe, grandinan y muchanan di Gaza,” of Sudan, of e paisnan rebelde cu no ta cuadra den nan dominio ta ser blokia economicamente.
