Un peticion pa tereno cu ta drenta Departamento di Infrastructura y Planificacion (DIP) via minister di Infrastructura cu su firma, por haya un trato preferencial. Den sentido cu e proceso por bay mas rapido. Sinembargo, esaki no ta un garantia.
Esaki Bon Dia Aruba ta compronde a base di un entrevista cu miembro team di maneho, Isabel Dammers.
Nos a trece e casonan dilanti di Ocean Z na Malmok, e peticion di e comerciante dudoso Roberto Rincón y esun di minister Otmar Oduber pa un tereno di huur pa agricultura. Tin hopi critica den comunidad, indicando cu minister di Infrastructura ta faborece amigonan politico.
En general sra. Dammers kier splica cu ora un peticion di e minister di Infrastructura ta drenta, mester cumpli den sentido cu e ta na mando. Pero esey no kiermen cu lo haci algo contra ley y sra. Dammers ta bisa den su tempo e no a mira asuntonan ilegal of cu nan a actua contra ley pa cumpli cu e peticionnan.
Banda di esaki tin diferente motibo cu minister ta pidi pa trata un peticion cu prioridad, e ta sigui splica. Por ehempel den caso hende a acerca minister pasobra nan ta wardando hopi aña caba mientrastanto nan a regla tur cos financiero caba, pues ta cla pa construi. Of personanan cu malesa of cu ta den otro situacion dificil, of persona cu tin un cumprado pues mester traspasa e tereno.
Tambe ora ta pidi expansion di nan tereno comercial, den caso di Rincón, esey por ta un motibo pa trata e peticion cu mas prioridad. Aunke sra. Dammers kier enfatisa cu den e caso di Rincón e peticion cu DIP tin, a bin for di un compania local y no ta riba nomber di e comerciante Venezolano.
Peticion minister Oduber
Den e caso di minister Otmar Oduber, esaki ta trata di tereno grandi di huur na Tamarijn cu tabata otorga na dos hende den pasado cu practicamente no tabata haci uzo di dje. E proceso ta tumando dos aña caba unda a kita e terenonan y a dicidi di parti esaki den pidanan mas chikito. Tin mas of menos 12 hende cu a pidi, y minister Oduber ta un di nan, asina sra. Dammers ta splica. Y e mester warda tambe mescos cu e otronan, riba un decision. Pues e no a haya e tereno ainda.
Procedura normal of preferencial
E procedura normal ta cu hende lo acudi na DIP cu tin diferente formulario pa sea pidi tereno priva, comercial of huur. Sra. Dammers ta bisa cu e secuencia ta bay segun e peticion: pues esun cu ta pidi prome, nan lo atende prome. Awor tin 11.000 peticion pa tereno y e ta bisa e procedura ta tumando añanan (5 -7 aña). DIP no tin e recurso tampoco pa contesta tur hende, informando nan cuanto tempo nan peticion lo bay tuma y tampoco por bisa si realmente lo bay haya e tereno pidi. Tin hopi hende cu kier biba na Noord, pero eynan e scarsedad di tereno ta mas halto.
Banda di e caminda normal, hende tambe ta acudi na DIP cu carta firma pa minister di Infrastructura Benny Sevinger, pensando cu esey ta un garantia pa haya tereno rapidamente. Sinembargo, sra. Dammers ta enfatisa cu esaki no ta e caso.
Manera menciona, esaki ta depende ki motibo ta su tras. “Ora nan ta bin keha despues pasobra nan no ta haya tereno of cu ta tarda, tin cu ta bisa cu nan lo bay minister bek y nos lo mira kico lo bay pasa.” Pero sra. Dammers ta bisa ni bou di presion aki, DIP lo move mas lihe. Tur cos ta depende di e situacion y tambe pakico minister ta pidi DIP pa coopera den cierto peticionnan. “Y finalmente anos no ta esun cu ta duna tereno, esaki ta keda den man di e minister. E ta duna e carta di reservacion pa bo haya e tereno pidi”, sra. Dammers ta splica.
Amigonan politico
Bon Dia Aruba tambe a puntra si bou di esunnan cu ta bin cu carta firma pa minister, tin amigo politico y ta hayando un trato preferencial. “Mi no sa si bou di nan tin amigonan politico. Esey ta un pregunta pa minister.”
Ta resta e pregunta importante ainda con por cu e minister di Infrastructura ta atende peticionnan di cierto hende rapidamente, manera nos por mira den e casonan di Ocean Z, Rincón y minister Otmar Oduber.
Den e caso di Rincón, cu a haci su peticion bou su nomber (no esun di e compania y of e doñonan riba papel), minister Sevinger a firma e carta den 3 dia di trabou y mand’e pa DIP, pidiendo nan cooperacion. Tene na cuenta tambe cu e persona aki ta envolvi den un caso grandi unda Merca a acusa Rincón di corupcion.
Y den e caso di minister Oduber, sr. Sevinger a firma mesun dia cu e peticion di su colega a drenta, compania cu e palabranan ‘gaarne medewerking’, pues pa DIP lo coopera. E echo ta cu e dia ey, 16 di november 2015, tabata e ultimo dia pa entrega un peticion pe tereno di huur na Tamarijn.
“Esaki tambe ta preguntanan pa minister”, sra. Dammers ta contesta.
