Un iniciativa ciudadano pa prohibi turista di drenta coffeeshop no a pasa den Conseho di Amsterdam, pasobra solamente e alcalde por tuma un decision riba e asunto aki.
Den lunanan recien, residente-, negoshi- y organisacionnan di turista a pidi pa medidanan pa yuda cambia e imagen internacional di Amsterdam. Segun Geerte Udo, director di agencia di marketing Amsterdam&partners, alrededor di un quinta parti di turista ta bishita pa usa droga y mira prostituta, y ‘nos no mester di eseynan’.
Maske un ley nacional ta bisa cu solamente residentenan Hulandes por cumpra cannabis for di e coffeeshopnan, Amsterdam nunca a enforsa e regla. Na momento cu a reforsa leynan nacional na 2013, tabatin preocupacion cu si aplica esakinan na e capital, lo pusha trafico di droga riba caya y crea mas molester.
Un mocion e aña aki di partido VVD pa enforsa e regla di solamente residente (‘i-criterium’) no a haya suficiente sosten pa pasa e Conseho, y e iniciativa di ciudadanonan no por wordo dicidi riba votacion den e Conseho, pero e debate a aumenta presion riba alcalde Femke Halsema pa produci un plan pa reduci molester relaciona cu turismo di droga.
Anteriormente e aña aki, Halsema a bisa consejalnan cu e kier ‘reduci e poder di atraccion’ di cannabis riba turistanan y combati criminalidad. Actualmente, ta suministra cannabis na e coffeeshopnan ilegalmente, pasobra produccion comercial ta prohibi – pero e benta di e producto ta permiti bao un convencion di ‘tolerancia’.
Don Ceder, un consejal di ChristenUnie kende ta prominente den campaña pa regulacion di coffeeshopnan, a bisa cu e iniciativa ciudadano no por a bay votacion pa motibonan tecnico, pero a mustra cu tin preocupacionnan aumentando. “Ta necesario pa cambia e imagen di Amsterdam radicalmente, pasobra actualmente nos ta mira como e capital di cannabis”, el a bisa. “E iniciativa aki a bin di ciudadanonan y tin un coalicion mas grandi di ciudadano-, politico- y negoshinan cu kier combati e problema.”
El a bisa cu e ta spera e analisis di e situacion di e alcalde, y e pro- y contra di regulacion di coffeeshopnan, cu lo ser comparti e luna aki y discuti den e conseho na januari.
Associacion di Coffeeshop, e Bond van Cannabis Detaillisten, sinembargo, ta opone fuertemente na mas regulacion riba coffeeshopnan, bisando cu lo pusha e industria riba caya y aumenta molester den e ciudad. Un vocero di alcalde di Amsterdam a bisa cu e alcalde lo haci un propuesta na e Conseho alrededor di dia 15 di december, pero ainda ta finalisando e detayenan.
