Temporada di Carnaval ta cerca, e prome parada di fakkel ta dia 4 di januari 2020. Vocero di Polis, Liliana Rasmijn a papia tocante e permiso cu mester ta na ordo pa vehiculo cu lo participa den parada.
Rasmijn a bisa cu DTI (departamento di inspeccion tecnico) ta cera dia 20 di december y ta habri bek dia 6 di januari. Pa e motibo aki tur cos mester ta na ordo prome cu parada dia 4 di januari. E auto tambe mester tin documento na ordo pa por participa den e parada di flambeu.
El a duna di conoce tambe cu nan lo ta stricto cada ora nan pidi documento pa controla. E persona mester por demostra esaki. E papel tin cu ta manera ta stipula. “Nos lo controla y si no cumpli cu rekisito, no por participa. Mester cumpli cu e ley stricto.”
Pa haci peticion pa bende articulo den parada di carnaval, e persona tin cu bin cu ID, pasfoto, papel di censo y carchi di salud publico pa por procesa esey. E ta bisa cu e proceso ta tarda 12 dia di trabou, sin inclui weekend.
Rasmijn ta bisa cu DTI ta habri di dialuna pa diabierna di 7or di mainta te cu 3or di atardi y por yama 585-2500, enfatisando cu nan no ta traha riba weekend. Pa corda riba e dianan di fiesta tambe prome cu aña caba.
Ademas e ta pidi pa tuma bon nota pa tin tur cos cla prome cu DTI cera dia 20 di december, ‘no laga tur cos pa ultimo di parti cuerpo policial’. Papel cu no ta na ordo ta nifica cu no por forma parti di parada fakkel y tambe mester tin papel na ordo pa henter temporada di carnaval. “Haci trempan pasobra december temporada ta cortico y hopi dia departamento ta cera.”
