Peticion pa organisa actividadnan “Covid proof”

Por lo pronto, no ta posibel pa organisa eventonan publico debi na e crisis di Covid-19. Esaki, mirando cu durante eventonan publico e riesgo di contagio cu Covid ta mucho mas halto dor di entre otro e cantidad di participante y diferente otro factor.

Sinembargo, denter di e reglanan vigente i bou di cierto circunstancia, Gobierno di Corsou a haci posibel pa tog ricibi un exonerenacion pa organisa un encuentro of actividad “Covid proof”. Mas cu claro, semper mientras por evita y garantisa cu ta tene debido cuenta cu e riesgonan di contagio tanto pa e organisado como e participantenan durante e actividad of evento aki.

Ya ta asina cu pa por organisa un evento, den mayoria caso, tin mester di un permit di evento. E exigencia aki ta mara na lei y mester haci e peticion aki prome na ‘Vergunningenloket’. E permit di evento ta un di e rekisitonan cu mester wordo inclui hunto cu bo peticion pa exonerenacion. Tuma nota, cu e exonerenacion aki ta necesario pa tur sorto di actividad y evento durante e crisis di Corona, no obstante di e permit di evento cu mester adkiri adelanta.

Tene na cuenta tambe, cu ta importante cu cada peticion mester inclui no solamente kico e actividad ta, pero mas bien specificamente con e actividad ta tuma luga y kico ta e plan di siguridad. Ta importante tambe pa entrega esaki sigur 3 siman prome cu e actividad tuma luga, pa motibo cu e trayecto pa por duna un conseho, ta tuma 10 dia.

Tur e condicionnan pa e exonerenacion aki ta ampliamente accesibel via di e pagina di www.kalamidat.cw bou di e ‘tab’ di exonerenacion. Aparte di e condicionnan, tin tambe e formulario pa esunnan interesa yena y asina entrega un peticion oficial na e ‘Toetsing- en Advies Commissie’ (TAC). TAC na su turno ta evalua e peticion y e documentonan entrega y ta duna conseho na e Team di Crisis. Na final, e Team di Crisis ta esun cu ta tuma e decision final si e actividad of evento por ricibi e exonerenacion pa tuma luga.

Un conseho pa evento den tempo di Covid-19 no ta un permit, pero mas bien un manera pa Gobierno motiva hende pa ora tog ke organisa algo, haci esaki den formanan alternativo mientras ta tene cuenta cu proteccion di hende den nos comunidad. Dor di duna e conseho adelanta, Gobierno ke evita tambe cu organisadonan ta perde inversion y tempo innecesariamente.