Manera cu nos a informa algun dia pasa despues cu nos entrevista cu minister di Infrastructura Benny Sevinger, tin plan pa construi dos hotel na Seroe Colorado pero no ta tur hende ta contento cu esaki.
Minister Benny Sevinger a laga sa cu tin dos cadena di hotel interesa den construi na San Nicolas, ambos lo consisti di 500 camber. Esaki no a cay den bon tera pa algun ciudadano cu a cuminsa reacciona mesora riba rednan social cu no tin necesidad di mas hotel na Aruba. E hotelnan ta di dos grupo di inversionista spaño. Nan lo ta all inclusive, uno bao cadena di NH Hotels y otro bao un grupo di Expedia, segun minister a informa.
Peticion pa stop
Ciudadano y periodista Dilma Arends a start un peticion pa purba yega na 500 firma pa stop e construccion di e hotelnan aki. E peticion ta bisa cu Seroe Colorado ta un parti unico di Aruba. Tin rikesanan historico y natural bou sub suela manera cuebanan, tunnel di awa, mina di fosfaat y sitionan di indjannan, cual ta algo cu Fundacion Accion Ambiental a ultimamente trece pa dilanti tambe. Nos a puntra minister Sevinger tocante esaki kende a bisa cu no ta na altura di dje. El a laga sa si cu si tin articulonan arkeologico pa protege cu lo zorg pa esaki wordo protegi debidamente.
E preocupacion tambe ta cu e desaroyo di un hotel grandi eynan lo destrui e beachnan unico den e parti aki di nos isla. “Mi a cuminsa cu ne door di frustracion. Despues di a wak e video y scucha e cantica di Roger Peterson. Mi tabata contra e racetrack pa mesun motibo. E unico cos cu mi a pensa ta Avaaz Petition ya cu mi ta actief riba dje,” sra. Arends ta bisa nos.
Avaaz.org ta pa causanan di perservacion rond mundo cu cada biaha un peticion yega na 400, nan mes ta sigui pusha pa mas. Esnan interesa pa firma e peticion aki por subi riba e link aki: AVAAZ.ORG
