E miembro di e comision Referendum 25 di Maart 1977 y accionnan di Augustus Scur 1977, ex sindicalista Leo Yarzagaray a entrega na prome minister, Evelyn Wever-Croes un peticion formal caminda nan ta pidi pa considera y evalua pa e dos acontecimentonan aki por haya su debido reconocimento. Esaki ta pa proclama 25 di maart como Dia Nacional y proclama luna di augustus como luna di balor y dignidad di pueblo Arubano.

Sr. Yarzagaray a declara na Bon Dia Aruba cu e solicitud di e comision aki forma pa ex sindicalistanan y militantenan cu e tempo aya a participa activamente den e dos acontecimento historico aki, ta pa gobierno actual evalua y considera realmente kico ta nifica e fecha di 25 di Maart cu a tene referendum pa nos historia combina cu Augustus Scur. “Duna e actonan historico aki e balor real cu nan ta merece”, el a bisa.

El a expresa cu sumo respet cu e fecha 18 di Maart cu nan a consider’e te cu 1977 e fecha mas importante pa Aruba su Status Aparte. Pero awe despues di e Referendum y e accionnan nan ta considera cu esaki tabata e base pa logra kibra e posicion di Hulanda y logra pa bin e conferencia di Mesa Rondo na 1983 y cu Aruba awe ta un pais. “Dicon e fechanan aki of e actonan historico aki no ta wordo debidamente conmemora”, el a bisa.

E solicitud aki a wordo entrega personalmente na e mandatario Wever-Croes, durante e presentacion di e prome buki di ex minister Rudy Croes bou e titulo E Homber’i Pueblo na Biblioteca Nacional Aruba.

Solicitud
Den e carta aki igualmente ta wordo pidi pa crea un comision pa cada aña prepara y organisa e conmemoracion corespondiente. Ademas crea un comision pa investiga, analisa, documenta y skirbi ‘e berdadero historia di e lucha Arubano’. E ta haya cu actualmente tin escritornan cu a dedica pa publica parti di nos historia, pero e ta hopi fragmenta y no ta existi un unidad di criterio pa bisa ‘esaki ta e berdadero historia’. E ta kere cu mester bin cu un historia berdadero y completo pa esaki lo wordo introduci den nos enseñansa pa e futuro generacion por corda dicon a yega na loke nos ta awe.

E carta aki tin 12 punto unda nan ta haci referencia na diferente acontecimento historico cu a forma parti di Aruba su lucha pa autodeterminacion. Riba e punto 8 nan ta referi textualmente cu: “Pa convence Hulanda y mundo cu e pueblo di Aruba kier su libertad a resulta necesario organisa un referendum cu a tuma luga 25 di Maart 1977. E resultado di e referendum ta cu 82% di pueblo a vota pro su derecho di autodeterminacion y asina ta converti den e maximo expresion di pueblo di Aruba den su historia y factor determinante pa e futuro di pueblo Arubano.”

Tambe riba punto 11 di e solicitud entrega na prome minister Wever-Croes ta bisa: “E accionnan di Augustus Scur a presiona gobierno Hulandes pa sinta na mesa y ta crea e condicionnan pa e Conferencia di Mesa Rondo cu a tuma luga na Maart 1983. E conferencia aki ta reconoce e derecho di autodeterminacion di Aruba y Aruba ta bira Pais den Reino na 1986, igual cu Hulanda y no someti bou di Hulanda.”