Abogado Geert w. Rep ta confirma na Bon Dia cu den nomber di Aruba Birdlife Conservation a lanta un kortgeding pa loke ta trata desaroyonan na un pida parcela (Wetland) banda di The Mill Resort.
Aparentemente tin rosamento tumando luga na e parcela aki pa construccion di camber di hotel pero esaki ta para den zona berde riba e Ruimtelijk Ontwikkelingsplan (ROP). A pidi accion inmediato di Corte pa para tur actividad temporalmente na e area aki. No ta sigur ki ora Corte lo actua riba esaki pero Bon Dia ta pendiente pa cualkier desaroyo.
Aruba Birdlife a bati alarma bisando cu nan lo ta vigilando e situacion pa segura cu ningun bulldozing tuma luga tanten cu hues tuma su decision. A pidi tambe si lo ta necesario pa boluntarionan keda pendiente pa traha un ‘human shield’ pa preveni mas destruccion na e area y sigur pa protege e neishi di shoco cu a wordo haya na e sitio. Autoridadnan a wordo yama pa bini e area pero esunnan cu te ainda a presenta tabata entre otro Aruba Birdlife, Parke Nacional Arikok y Departamento di Medio Ambiente (DNM).
Desaroyo di casi 30 aña
Nos a combersa cu chief engineer di The Mill kende ta bisa cu pa 29 aña caba nan ta pagando grondbelasting y erfpacht pa e pida parcela aki. Tur impuesto ta paga tambe y esaki ta e tercer fase pa completa nan projecto na The Mill, conectando e cu e otro banda. E chief engineer ta bisa cu e pida tereno patras ta Wetland, pues esun cu no ta rosa net no ta parti di e zona berde te asina cu e ta na altura di dje pa tur e añanan aki. Segun nos a compronde, e pida tereno aki no ta registra tampoco riba The Mill. Pues si ta pagando tanto placa pa luna di erfpacht/grondbelasting pa e tereno aki y esaki resulta cu tabata riba zona berde anto mester entrega e tereno bek, e pregunta ta keda si tur e placa aki lo wordo paga bek tambe.
Bon Dia lo ta siguiendo e desaroyo di e caso aki for di cerca.
