Peticion Incinerator ter inzage na DWJZ, por entrega obhecion

Desde ayera Departamento di Legislacion y Asunto Huridico (DWJZ) tin e peticion pa opera e incinerator cu lo bay ta na dump di Parkietenbos disponibel pa cualkier ciudadano por lesa. Cualkier persona tin 30 dia pa entrega nan obhecion contra e operacion.

Asina un aviso publica den nos corant di 21 di juli 2020 ta indica, riba pagina 12. E aviso ta indica cu ta trata aki di un peticion di permiso na Parkietenbos 2, pa crea un instalacion di kimamento pa procesa lodo cu ta origina di e planta di tratamento di awa di riool, residuo medico y bestia morto.

T’asina cu mester entrega un peticion pa un permiso ora di opera un establecimiento cu lo por causa daño, molester of peliger den cuadro di e Hinderverordening (AB 1988 no. GT 27). E Hinderbesluit (AB 1995 no. GT 20) ta regla kico ta e tipo di cosnan cu por cay bou e ley di molester, por ehempel: fabrica di asfalt, sitio pa deshaci di desperdicio y sitionan pa procesa sushi.

Den articulo 1, inciso 1 di e Hinderverordening ta indica cu ningun establecimiento cu causa daño, molester of peliger por wordo lanta, sea pa via di holo, huma, vapor, of zonido duro sin permiso di e minister encarga cu husticia. Inciso 2 ta indica cu pa haci cambionan na un establecimento asinaki, cambia esaki di luga, of expand’e, tambe mester un permiso.

Segun articulo 4 di e ley aki, cualkier persona tin 30 dia pa entrega nan obhecion (bezwaar) contra otorgamento di e permiso aki, y e minister en cuestion tin cu dicidi dentro di 1 luna despues cu e procedura a tuma luga si ta otorga e permiso si of no. Den cuadro di e ley personanan cu entrega obhecion sea por escrito of palabra, hunto cu e peticionario ta tende kico tur e obhecionnan ta.

E procedura aki ta estableci pa asina personanan cu por sufri di cualkier molester, peliger of daño por haya un bos. P’asina preveni cu ta establece establecimiento sin tende di personanan cu sufri si e permiso wordo otorga. Si haci un calculacion di e cantidad di dia cu e procedura pa keha ta tarda, e ultimo dia pa entrega obhecion na departamento DWJZ lo ta 20 di augustus 2020 pa e permiso pa opera e incinerator na Parkietenbos 2.