Gobierno Cubano a paga mas di 5 mil miyon dollar na su acreedornan na 2016, segun cifra oficial di Comision pa America Latino Y Caribe (CEPAL), cita pa e diario El Nuevo Herald.

E diario ta agrega cu a pesar di aumento di turismo, cu a raporta un aumento di 15% di su entrada aña pasa pa yega na recauda 1200 miyon dollar. Cuba su sector turistico a crece na 2016 y a yega na mas di cuatro miyon di bishitante. Hunto cu servicio specialisa medico esaki ta percura pa gran parti di divisa di e isla pa garantisa importacion y paga debe externo. Esaki sin embargo no ta compensa suficiente pa e caida den otro sectornan economico y economia Cubano ta sigui den cifra cora pa e aña aki. Entre e elementonan cu ta influencia e proceso aki ta destaca e crisis na Venezuela y e continuacion di pago di e debe externo.

Tanto gobierno Cubano como CEPAL a pronostica cu e Producto Interno Bruto (PIB; GDP) lo crece 2% na 2017. Sin embargo, e ultimo reporte di Cuba Standard Economic Index ta señala cu, leu di esaki, lo tin un decrecimento entre 1,4 y 0,3%. E reporte ta indica cu e reforma inicia pa Raúl Castro “a priminti un crecimento di PIB di 5,1%, después a ahusta esaki na 4,4% pero e promedio real di crecemento di 2008 pa 2016 tabata apenas 2,3%. E final no por tabata mas desalentador, cu un recesion na 2016 (-0,9%) y un proyeccion bastante insigur pa 2017 pa loke ta un recuperacion rapido di e recesion y di loke por spera cu por pasa cu actual gobierno di Trump.


Tin algun noticia contradictorio encuanto e cumplimento cu pago di tur debe externo durante 2016. Segun gobierno esey ta e caso, pero tin otro señal cu ta indica cu a keda como 800 miyon dollar sin paga. Gobierno di Cuba ta bisa cu a paga en total $5299 miyon na varios miembro di ‘Club di Paris’ y a base di acuerdo firma separadamente cu Rusia, Alemania y Hapon na e ultimonan aki. Ta admiti si cu no tur e pagonan a tuma lugar na tempo, specificamente cierto préstamo comercial a corto plazo.

Cumplimento cu pago di debe externo pa Cuba ta sumamente importante pa mantene acceso na prestamo nobo necesario pa desaroyo den varios sector.