(La Republica) – Coordinador Nacional Unitario di Lucha conhuntamente cu Asociacion de Movimientos Regionales de Peru, Iniciativa Democratico y Warmikunas, a duna di conoce cu lo realisa un marcha nacional pa dianan 27 y 28 di juli den un acuerdo cu ta implica e compromiso di reuni e mayor number di organisacionnan social pa centralisa e marchanan contra Boluarte y Congreso di Republica.

Presidente di Asociacion de Movimientos Regionales, Freddy Vracko, a informa cu den un reunion di lidernan y organisacionnan tambe a aproba participa den welga nacional di 19 di juli di Confederacion General de Trabajadores de Peru (CGTP).

“19 di juli nos ta bay acompaña tur di nan den convocatorio haci pa CGTP pa un welga nacional, y 27 y 28 di juli ta bay realisa e marcha den tur region na ciudad di Lima,” e dirigente a bisa.

Vracko tambe a menciona cu mientras tanto nan lo fortalece e accionnan cu nan mester realisa pa organisacion di e mobilisacionnan aki.

El a bisa cu e siman aki a tuma luga diferente reunion cu studiantenan recien gradua di Universidad Catolico y Colegio di Abogado di Lima (CAL), e mesun cu a pronuncia contra reforma constitucional cu ta propone elimina e movementonan regional, lagando solamente e partidonan politico. El a menciona cu pa e marchanan ey, CAL a ofrece pa tin un grupo di abogadonan cla pa evita cualkier abuso contra manifestantenan, y cu entre ex-studiantenan di Universidad di San Marcos ta bay organisa brigadanan di salud.

“Nos ta organisando cu hopi cuidou cada un di e detayenan di e mobilisacionnan aki na Lima,” el a bisa.

Famianan di esnan cu a ser asesina den protestanan social di januari 2023 na Puno a informa cu nan lo biaha pa Lima, na unda nan lo lidera protestanan contra Gobierno di Dina Boluarte, exigiendo husticia. Pero nan no ta bay ta e unico, tambe lo ta presente famianan di personanan cu a perde nan bida den man di Forsa Arma na diferente region for di momento cu e mandatario a asumi su funcion dia 7 di december 2022.

“Ta un decision cu nos ta considera husto y necesario pasobra nos kier cu e responsabel di e crimennan paga pa su culpa y bay cera hunto cu tur e mando militar. Den e obhetivo ey, nos lo no retrocede. E memoria di nos sernan keri no ta bay keda den laira. E gobierno aki tin cu bay,” Raul Salmillan ruman di e dokter Marco Antonio Salmillan ken a perde su bida 9 di januari 2023 a declara.

E ta considera cu e tempo a duna rason na ciudadanonan, pa motibo cu e dictadura cu tabata evita e protestanan cu awe ta un realidad.

“Tur loke a adverti, awendia nos ta bibando. Gobierno di Boluarte ta mantene debi na Congreso y Forsa Arma. Nan ta imponiendo leynan y normanan na beneficio di corporacionnan empresarial y contra ciudadanonan, tur esaki ta pa nos compronde cu nos tabatin rason.” Salmillan a bisa.