Estado di Peru a bisa cu no lo bay contrata e empresa di Brasil Odebrecht mas y lo obliga e empresa pa cumpli tur su debe na Peru, prome cu nan por transferi nan placa pa exterior, asina Pedro Pablo Kuczynshi, presidente di Peru a bisa.
Kuczynski a papia di hopi medida contra e empresa cu a acepta culpabilidad den acto di corupcion o cu a haya condena pa mesun acusacion, pasobra el a sigura cu e caso Odebrecht ta e caso mas grandi, pero no ta e unico.” E presidente a anuncia cu empresa manera Odebrecht mester solicita permiso di gobierno di Peru na momento cu nan kier bende su activonan, y cu e placa ey lo bay den un fondo cu por garantisa pago di multa cu husticia di Peru lo dune. Odebrecht a admiti cu nan a paga 29 miyon dollar na soborno na funcionario di Peru entre 2005 y 2014.
Otro medida ta inclusion den tur contrato di Peru di un clausula anti-corupcion, y asina autoridad lo por cancela tur acuerdo relaciona cu algun proyecto, cu por tin corupcion of delito aden, pa asina haya e contrato. Presidente di Peru a bisa cu tur medida ta bin hunto cu iniciativa di aumenta e presupuesto di fiscalia, pa asina por haci investigacion y detene hende corupto, “caiga quien caiga”.
