Cu un fayo dividi, Tribunal Constitucional di Peru a considera 25 di november ultimo tin base den e ‘habeas corpus’ solicita pa defensa di e lider opositor Keiko Fujimori; y di e forma aki, a habri e portanan pa su libertad despues di ta casi 11 luna den prizon preventivo.
E medida, cu a ser aproba pa un mayoria di 4 voto contra 3 di e magistrado, ta supone e liberacion inmediato y sin restriccion pa e lider di Partido Popular, kende ta investiga pa presunto labamento di activo y vinculo cu e empresa constructor Brasileño, Odebrecht y otro firma.
Di e manera aki, despues cu TC a duna luz berde pa e recurso presenta pa su ruman muhe Sachi, Keiko Fujimori, tambe yiu di e ex-presidente Alberto Fujimori lo por continua e proceso hudicial den libertad, den espera di un resolucion definitivo.
Durante un conferencia di prensa, Presidente di Tribunal Constitucional, Ernesto Blume a aclara cu e cuerpo a expresa riba e prizon preventivo contra Keiko Fujimori, pero no a dicidi riba e acusacion cu ta pesa riba e congresista.
Blume tambe a indica, cu ademas di dje, Magistrado José Luis Sardón, Augusto Ferrero y Carlos Ramos a vota na fabor di e recurso, mientras cu Manuel Miranda, Marianella Ledesma y Eloy Espinosa-Saldaña a manifesta den contra.
Mark Vito Villanella, casa Mericano di Fujimori a ricibi e noticia cu alegria, cu el a cumpli e dia 25 di november 13 dia den welga di hamber pa exigi e liberacion di su casa y a rechasa e supuesto ‘persecucion politico contra dje’. Afo di e Anexo di Muhenan di e prizon di Chorrillos, e homber a señala cu e lo mantene su protesta tanten su casa lo bandona e prizon.
