Secretario di Estado Mericano Rex Tillerson a elogia ayera e liderazgo di Peru y e papel di e grupo di Lima den e buskeda di un solucion regional pa e crisis cu ta afecta democracia na Venezuela.
“Estadonan Uni ta aprecia e liderazgo di Peru den region y, en particular e papel hopi importante cu ta hunga den e grupo di Lima en bista di e teribel destruccion di e procesonan democratico na Venezuela”, Tillerson a bisa na prensa despues di un reunion cu porta cera cu e presidente Peruano Pedro Pablo Kuczynski.
E hefe di diplomacia Mericano a resalta cu e tabatin cu e mandatario Peruano “un hopi bon intercambio acerca di loke nos por haci pa Venezuela por bolbe na su constitucion legal.”
E Cumbre de las Americas, cu Peru ta organisa dia 13 y 14 di april na Lima, y den cual e presidentenan Donald Trump y Nicolas Maduro por topa otro, tambe tabata tema di discusion. “Mi ta kere cu e agenda tocante corupcion y bon gobernacion lo ta util”, Tillerson a remarca.
E tema central di e cumbre lo ta gobernabilidad democratico, en bista di corupcion.
Kuczynski, cu a impulsa e creacion di e grupo di Lima na 2017, a señala cu e colectivo ‘ta cla pa pronuncia nan mes tocante eleccion na Venezuela’ cu Caracas a convoca anticipadamente pa prome cu 30 di april, na mesun momento poniendo restriccion pa oposicion.
“Nos ta pensa cu mester fortalece e ayudo humanitario na Venezuela pasobra di otro manera nos lo tin un pais cu un problema grave memey di e region puhante aki”, segun e presidente Peruano.
Tillerson y Kuczynski a discuti cerca di un ora den e ultimo dia di bishita na Peru di Tillerson. No tabatin preguntanan di prensa despues di e reunion y di e declaracion cu nan a brinda den e palacio di gobierno.
E grupo di Lima ta integra pa 12 pais Americano, cu ta analisa e crisis economico y social na Venezuela, di cual nan ta critica e regimen pa su tendencia autocratico.
Tillerson a continua ayera su biahe pa Bogota pa e siguiente etapa di su gira.
