Diasabra ultimo, autoridadnan di Peru a ricibi un brigada di nuebe medico Spaño di e organisacion humanitario Mediconan sin Frontera pa yuda combati e Covid-19 den region Amazonico di San Martin, Ucayali, y Loreto, unda e cantidad di contagio a yega 322.710 caso na e pais.
“E standard di operacion di boso ta algo cu nos mester siña como organisacion, pasobra nos pais ta hopi vulnerabel. Awor ta pa Covid-19, pero ayera tabata e fenomeno El Niño, temblornan of violencia social cu ta aisla e comunidadnan henter y na e momentonan aki, nos mester yega te nan cu asistencia sanitario”, minister di Salud, Victor Zamora, a expresa na momento cu a ricibi e delegacion Spaño.
“Nos lo siña di e bishita aki como profesionalnan, personanan y institucion”, e minister Peruano a agrega.
E nuebe medico bishitante lo atende pashentnan grave cu ta den ICU na regionnan selvatico, unda e pandemia a pone den evidencia e falta di ekipo y suficiente personal.
Zamora a agrega cu e ministerio lo hiba pa e regionnan ey ventilator mecanico, medicina y pruebanan pa reforsa e respuesta sanitario.
Tambe Ministerio di Salud a informa diasabra ultimo cu e number di personanan contagia di Covid-19 a yega na 322.710, caso cu 3.064 mas confirma den ultimo 24 ora, y cu a analisa 1.904.242 persona, cu 20.916 prueba realisa desde diabierna ultimo.
Di acuerdo cu un rapport oficial, e cantidad di pashent recupera den ultimo 24 ora ta mayor cu e cantidad di contagio, cu 3.514 persona malo cu a sali for di hospital, loke ta suma un total di 214.152 persona cu a recupera di e virus.
Asina mes, diasabra ultimo tambe a reduci e cantidad di hospitalisacion, cu 11.932 pashent, como di personanan interna na UCI, cu seis mas compara cu diabierna ultimo cu ta suma 1.315 persona conecta na un ventilator mecanico.
