(DW) – E politico Peruano Keiko Fujimori a presenta na apertura di huicio cu ta enfrenta pa labamento di activos den scandal di Odebrecht, y pa lo cual lo por haya un condena di hasta 30 aña di prison.

Durante e ultimo seis aña, ekipo special di fiscalnan “Lava Jato” a investiga e yiu muhe di e ex-presidente Alberto Fujimori, ken a haya un amnistia na december 2023 ora tabata cumpli un condena pa violacion di derechonan humano na Peru.

“Mi ta declara cu e huicio a cuminsa,” e presidente di e tribunal, hues Juana Caballero a bisa despues di seis ora di audiencia na unda a nenga varios pedido pa anula e huicio.

Cu e presentacion di argumentonan di fiscalia, e prome audiencia a conta cu e presencia di Keiko Fujimori den e sala. “Mi nomber ta Keiko Sofia Fujimori Higuchi mi ta traha como presidente di partido Fuerza Popular y mi ta gana 14,000 sol mensual (casi 3.600 dollar,) e politico influyente a bisa na tribunal.

E huicio den cual tin cita mas di 1,500 testigo, lo por tarda mas cu un aña. E fiscal di e caso, Jose Domingo Perez, a yega na audiencia cu un bulletproof y bao un skema di seguridad basta fuerte.

Fiscalia Peruano a conclui cu Keiko a financia su campañanan di aña 2011 y 2016 cu placa di Odebrecht cu e no a declara.

Segun e acusacion, e compania constructor Brasilero a entrega 1.2 miyon dollar na Keiko den skema di soborno cu a haci rond Latino America a cambio di haya contractnan.

Pafo di e sede hudicial, casi 80 siguido di Keiko tabata grita “husticia si , vengansa no. Keiko ta inocente,” Polis mester a interveni pa evita enfrentamento cu otro grupo opositor na e dirigente politico.

E trama di scandal di corupcion di Odebrecht na Peru tambe a involucra cuatro ex-presidente di e pais, entre 2001 y 2016.

Ex-hefenan di Odebrecth a yega di bisa cu nan a reparti miyones di dollar na politiconan Peruano, entre nan Keiko y cuatro ex-presidente: Pedro Pablo Kuczynski (2018-2016), Ollanta Humala (2011-2016), Alan García (1985-1990 y 2006-2011) y Alejandro Toledo (2001-2006).

Keiko di 49 aña y lider di Fuerza Popular, e partido principal di derecha na Peru, semper a proclama su inocencia durante investigacionnan y a cumpli cu 16 luna di prison preventivo. E ta acusa pa labamento di activos, crimen organisa, obstruccion na husticia, falsedad y declaracion falso den un procedemento administrativo.

Aunke pa e tempo ey tabata permiti aporte di companianan stranhero na campañanan, fiscalia a procesa Keiko pa no a declara e entrada di placa di Odebrecht.

Awor fiscalia ta pidi 30 aña y 10 luna di prison pa e tres biaha candidato presidencial Peruano.