Mañan comunidad Peruano na Aruba ta conmemora e di 199 aniversario di nan independencia. E biaha aki no tin celebracion. Presidente di fundacion “Fiestas Patrias Peruanos na Aruba,” Sr. Guillermo Salinas a declara cu e aña aki, nan a dicidi pa organisa un Santo Sacrificio di Misa pa recorda e victimanan di e Covid na Peru.

Peru ta un di e paisnan mas afecta pa e pandemia aki na Latino America. Nan tin un total di mas cu 379 mil caso positivo di Covid y alrededor di 18 mil hende a muri victima di e virus aki na Peru, segun data di Instituto Nacional di Salud na Peru.

“Nos a dicidi di bin cu un misa pa fortalece nos espiritu,” el a bisa na e matutino aki. E ceremonia religioso aki tabata un muestra di solidaridad pa e famianan cu a perde nan sernan keri pa causa di Covid.

E celebracion di misa na Catedral San Francisco a conta cu presencia di Consul Peruano, Giovanna Tapias, director di departamento di Relacion Exterior, Edwin Abath, representantenan di gobierno y Parlamento. Sr. Salinas a bisa cu nan a bin haci oracion pa nos gobernantenan pa nan por tuma e miho decision pa administra nos pais. Y tambe pa e comunidad Peruano residencia na Aruba cu a bira nan di dos patria.

Den nomber di e fundacion aki cu tin 4 aña di existencia, Sr. Salinas a bisa cu nan a percura semper pa organisa un acto protocolario. E biaha aki debi na e circunstancia di e Covid, nan a prefera un acto senciyo di hisamento di bandera na halfstok riba Wilhelmina Park pa 10or di mainta. Nan ta realisa esaki pa recorda nan patria.

Sinembargo, el a bisa cu e acto aki ta uno masha reserva pa respet cu e medidanan adopta pa atende cu e pandemia na Aruba. Ademas nan ta bay hisa e bandera halfstok pasobra Peru ta den duele nacional den cuadro di nan Dia di Independencia awe. Independiente di e situacion actual, el a destaca e balornan y tradicion di e pueblo Peruano, nan cultura y gastronomia. “Cada Peruano ta un embahador di nos pais,” Sr. Salinas a declara.

Actualmente nan comunidad na Aruba ta consisti di mas cu 1200 Peruano. E fundacion aki ta conta cu sosten di un 40% di nan compatriotanan. Nan meta ta esun di duna servicio no solamente na e Peruanonan cu ta residencia na Aruba, sino pa henter comunidad.

Sr. Salinas a laga sa cu atendiendo cu e problema socioeconomico cu e pandemia a trece cune, nan fundacion a entrega algun donacion en general, tanto pa nan paisanonan Peruano, pero tambe personanan di otro nacional den necesidad.